Misis, pinagdudahang may lalaki | MISTER NAGBIGTI

DEDO ang 36-anyos na lalaki matapos magbigti dahil umano sa selos makaraang makatalo ang kanyang live-in partner sa Valenzuela City, kahapon ng madaling-araw.

Inakusahan ni Jesus Tubalinal, ng Gen. T. de Leon ang kanyang live-in partner na si Analyn Magayanes, 35, na nakikipagrelasyon umano sa ibang lalaki na naging dahilan upang mauwi ang mga ito sa pagtatalo.

Hanggang sa nagpasya si Magayanes na umalis at lumabas ng bahay habang naiwan naman sa loob ang kanyang ka-live-in at kanilang anak na babae at lalaki na edad 10 at 11.

Makalipas ang ilang minuto, nakita ng magkapatid ang kanilang ama na nakabigti gamit ang sinturon at tela na naging dahilan upang tumakbo palabas ang magkapatid at hinanap ang kanilang ina.

Nang bumalik ang ginang, laking-gulat nito nang makita ang biktima na nakabigti at wala na itong buhay.