RESPETADONG AKTRES, NAGKA-SECRET AFFAIR SA MAS BATANG GUWAPONG AKTOR BAGO NAGPAKASAL SA PULITIKO
ni Erlinda Rapadas - @Teka Nga! | September 11, 2020
BLIND ITEM:
Napakagaling magtago ng sikreto sa buhay ng magaling at inirerespetong aktres. Dahil maganda, sikat at malakas ang karisma, naging napakakulay ng kanyang buhay-pag-ibig. Maraming aktor-basketball players at negosyante ang nanligaw sa magaling na aktres. Marami siyang nakarelasyon lalo na noong kanyang kabataan.
Pero hindi siya makondena ng publiko dahil mabait siya at karespe-respeto. Hindi siya hinusgahan at nilait-lait. Tinanggap na lang ng lahat maging ng kanyang mga loyal fans ang mga kaganapan sa love life ng magaling na aktres.
Unang nagpakasal ang aktres sa isang aktor na hindi kasingsikat niya, pero malakas ang personalidad. Nagkaanak sila pero nauwi sa paghihiwalay. Marami silang hindi mapagkasunduan at laging nag-aaway. Pareho silang mataas ang standard sa buhay at ayaw magpadaig-magpatalo sa isa't isa!
May ilang karelasyon pang sumunod bago nakilala ng magaling na aktres ang isang non-showbiz guy na nalilinya sa pulitika. Naging daan ito upang mabuksan ang oportunidad sa aktres na subukan ang kanyang kapalaran sa pulitika. Mismong sa bayan ng kanyang mister pinalad na makapuwesto ang magaling na aktres.
Pero bago pa nagpakasal ang aktres sa baguhang pulitiko, may lihim na siyang May-December affair sa isang guwapo at mas batang aktor. Tanging ang mga taong nakapaligid sa respetadong aktres ang nakakaalam ng kanyang sikreto. Patago ang lahat pero totoong na-in love sila sa isa't isa.
Masaya at tahimik na ang buhay ngayon ng guwapong aktor sa piling ng kanyang maybahay at mga anak, gayundin naman ang aktres na masaya sa napangasawa niya.
Comentarios