ni Chit Luna @News | Mar. 21, 2025
Nanawagan ang ilang grupo sa World Health Organization (WHO) na pag-isipang maigi ang pagdaraos ng magastos na 11th Conference of the Parties (COP11) sa Framework Convention on Tobacco Control (FCTC) sa harap ng lumiliit na pondo ng organisasyon bunsod ng pag-alis ng Amerika.
Ayon sa mga tagapagtaguyod ng pagbabawas ng pinsala kabilang ang Coalition of Asia Pacific Tobacco Harm Reduction Advocates (CAPHRA), dapat idirekta ng WHO ang pondo nito mula sa mahal na pagpupulong sa Geneva sa Nobyembre 2025 tungo sa matitinding krisis sa kalusugan ng mundo imbes na ang patuloy na pag-atake sa tobacco harm reduction.
Binanggit nila ang pag-asa ng WHO sa pribadong tagapondo tulad ng Bloomberg Philanthropies na nakaapekto sa pagbabago ng focus ng organisasyon.
Sinabi nila na ang pagtutok ng WHO sa tobacco control ay inilihis ang mga pondo mula sa mandato nito para itaguyod ang kalusugan at kaligtasan at tulungan ang mga mahihirap.
Ang COP11, na naka-iskedyul para sa Nob. 17 hanggang 22, 2025 sa Geneva International Conference Center sa Switzerland, ay inaasahang gagastos ng milyun-milyong dolyar.
Umalis ang United States sa pagiging miyembro ng WHO, dahil sa umano’s maling paghawak ng organisasyon sa pandemya ng COVID-19 na nagmula sa Wuhan, China, at iba pang mga pandaigdigang krisis sa kalusugan, ang kabiguan nitong magpatibay ng mga reporma at ang kawalan nito ng kakayahang magpakita ng kalayaan mula sa pulitika.
Nahaharap ngayon ang WHO sa problemang pinansiyal kasunod ng pag-alis ng US, samantalang ang iba pang mga donor ay nagbawas ng kontribusyon.
Nangangamba ang ilan na gagamitin ng mga pribadong donor tulad ng Bloomberg Philanthropies ang pagkakataong ito para palakasin ang impluwensya nila sa WHO.
Binanggit din ng mga kritiko ang paninindigan ng FCTC laban sa harm reduction sa kabila ng makabuluhang siyentipikong ebidensya na sumusuporta sa hindi gaanong nakakapinsalang mga alternatibong nikotina.
Inakusahan nila ang FCTC ng kawalan ng transparency, na lalong sumira sa tiwala ng mga miyembrong bansa.
Kinuwestiyon din ng mga harm reduction advocates ang kakayahan ng FCTC na manguna sa pandaigdigang summit sa nikotina. Nanawagan sila sa mga partido sa FCTC na magbantay laban sa mga kontra-siyentipikong pamamaraan na maaaring isulong anila ng WHO FCTC.
Sa Pilipinas, nagsagawa ng pagdinig ang House Committee on Good Government and Public Accountability noong 2021 sa regulasyon ng mga e-cigarette at heated tobacco products at nalaman na ang Food and Drug Administration ay tumanggap ng mga gawad mula sa Bloomberg Philanthropies para suportahan ang pagbuo ng patakaran.
Ang pagsisiyasat ay umabot sa WHO FCTC, na nahaharap sa katulad na kritisismo hinggil sa impluwensyang pampulitika ng mga grupong may interes at panghihimasok sa mga lokal na patakaran ng Pilipinas, India, Pakistan at Vietnam.
Ang pag-alis ng US ay nag-udyok din sa mga bansa kabilang ang Italy, Argentina at Hungary na muling isaalang-alang ang kanilang kaugnayan sa WHO.
Sinasabi ng mga kritiko na ang mga isyung ito ay nagpapahina sa kakayahan ng WHO na pamahalaan ang mga pandaigdigang krisis sa kalusugan.
Kasunod ng pag-alis ng US, ang WHO ay lalong umaasa sa pribadong sponsor, partikular ang Bloomberg Philanthropies, na umani ng batikos mula sa mga bansa kabilang ang Pilipinas dahil sa diumano'y pakikialam ng huli sa lokal na patakaran.
Sinabi ni dating Rep. Jericho Nograles na sinubukan ng mga dayuhang pribadong organisasyon na impluwensyahan ang mga patakaran ng Pilipinas sa pamamagitan ng paggawad ng pondo sa mga ahensya ng gobyerno, na tinawag niyang "isang pag-atake" sa soberanya ng bansa.
Ayon kay Nograles, ang malaking tanong ay pinapayagan ba ang mga ahensya ng gobyerno na maimpluwensyahan ng pera na nagmumula sa mga dayuhang pribadong organisasyon. Dagdag ni Nograles, ito ay isang paglabag sa konstitusyon at pag-atake sa soberanya ng Republika ng Pilipinas.
Sinabi naman ng mga harm reduction advocates na ang mga bansang tulad ng Pilipinas ay nahaharap sa maraming isyung pangkalusugan ng publiko, ngunit ang WHO ay nag-iimpok ng pondo para idaos ang magastos na summit sa tobacco control.
Pinuna rin nila ang WHO at ang WHO FCTC sa pagbabalewala ng siyentipikong ebidensya pabor sa mga pribadong taga-pondo.
Komen