ni Ador V. Saluta @Adore Me! | August 31, 2023
Makahulugan ang mga binitawang posts ni Vice Ganda sa X (dating Twitter) na tila pasaring sa dating Kapamilya TV host na si Toni Gonzaga nitong nakaraang Linggo, August 27.
Tweet ni Vice, “Nakapag-reinstall na ba lahat? Happy Sunday! (orange heart emojis).”
Bago ang naturang post ni Vice ay ang pagpapakilala sa kanya bilang bagong brand ambassador ng online shopping platform na Shopee.
Naging usap-usapan ang naturang tweet ng It’s Showtime host para sa dating PBB host na si Toni kaya umani ito ng iba’t ibang reaksiyon mula sa mga netizens.
Ayon sa kanila, tila “shade” o pasaring daw ito ni Vice kay Toni na dating brand ambassadress ng nasabing shopping app na Shopee.
Matatandaang noong September 2022, nag-trending sa social media ang “Bye Shopee” matapos nilang umani ng kritisismo at naging nega dahil sa pagiging celebrity endorser ni Toni ng nabanggit na shopping app.
Maraming Shopee users ang na-turn-off sa TV host-actress dahil sa lantaran nitong pagsuporta at pangangampanya kay Pangulong Bongbong Marcos, Jr..
Ang lalo pang nagpagalit sa ilang netizens ay ang kumalat na balitang nagtanggal o nag-retrench daw ng mga empleyado ang Shopee para makuha ang serbisyo ni Toni, na milyun-milyon umano ang idinemand na talent fee.
At dahil sa nangyari, maraming netizens ang nag-uninstall umano ng nasabing shopping app. Marami rin ang nagsasabing in-install na nilang muli ang Shopee app dahil hindi na si Toni ang ambassador nito.
Sa comment section ng post ni Vice ay bumuhos ang komento mula sa mga netizens na naniniwalang tila patama kay Toni ang post nito.
Komento ng isang netizen, “FINALLY!!! Yes po, opo, Meme! Na-miss ko, in fernez ang Shopee! I had been praying that this day would come! [laughing in tears emoji].”
“Basta, wala na si Toni Gonzaga!!!!! Install ko na ulit,” hirit naman ng isa pa.
Ayon pa sa isang Shopee user, “'Di ako nag-uninstall, pero ‘di ko rin ginamit. At least ngayon, maluwag na sa dibdib na magagamit ko ang Shopee na wala si Toni.”
Bukod doon, nakakairita rin daw para sa mga netizens ang tila pagkampi ng kanyang mister na si Direk Paul Soriano na tinawag pa ang asawang si Toni na “The Most Powerful Celebrity”. Tanong tuloy ng ilan, “Nasaan na ang power?”
Hanggang sa ngayon, wala pang opisyal na pahayag ang Shopee sa pagligwak kay Toni at pagkuha kay Vice bilang kapalit nito.
Comments