ni Ador V. Saluta @Adore Me! | August 4, 2023
Espesyal na panauhin sa It's Showtime last August 1, Tuesday, ang Kapuso actress na si Bianca Umali. Bukod kay Vice Ganda, mainit ang pagtanggap ng mga kapwa hosts ng nasabing programa na sina Vhong Navarro, Kim Chiu, T'yang Amy Perez, Karylle, Jugs and Teddy at Ogie Alcasid kay Bianca.
Isinali sa Rampanalo segment ang Kapuso actress bilang isa sa mga box holders. Bago pa ang naganap na guesting ni Bianca, nabanggit niya kay Vice, “Kinakabahan ako dahil first time kong magge-guest sa It's Showtime. ‘Di na ako nakatulog.”
Bago siya sumalang sa naturang segment, nagpakitang-gilas sa kanyang production number si Bianca. Puring-puri ni Vice ang sexy dance production number ng actress sa kantang Dangerous Woman ni Ariana Grande.
Nakasuot si Bianca ng leather crop top, leather shorts, at thigh-high leather boots para sa kanyang sing-and-dance prod.
Pinuri ni Vice si Bianca, “I'm sure, madaming madlang people ang naka-appreciate ng prod mo.
Ang galing mo and ang ganda mo!”
“Lahat kami, happy dito. Hindi lang mga cameramen, kaming mga staff, mga hosts,” dagdag pa nito.
Dahil bago sa mata, litanya ni Vice na marami raw sa cameramen ng noontime show ang nabighani sa kagandahan ni Bianca base sa mga camera shots ng production number ng Kapuso actress.
“Parang close na close mo ‘yung mga cameramen. Close-up na close-up!
“Fourteen years na ako rito, apat lang ang close-ups ko. Kasi ‘yung mga cameramen namin, inspired kapag nakakakita sila ng maganda.”
Sabay sabi niya uli kay Bianca, “We're so happy that you are here!”
Lubos din ang tuwa ni Bianca na makatungtong sa It's Showtime studio sa ABS-CBN compound sa kauna-unahang pagkakataon.
“Kinakabahan talaga ako mula kagabi pa. Naisip ko, ‘pag makita ko na sina Meme Vice, kakabahan ako lalo, ‘pag nakita ko sina Kuya Vhong (Navarro), sina Ate Kim (Chiu).
“Pero nu’ng nakatungtong na ako, ang saya. Kasi it's new doors, new opportunities opening for everyone. Ngayon, ‘eto, sama-sama tayong lahat. Ang sarap po sa puso,” sabi ni Bianca.
Sabi naman ni Vhong, “Huwag kang mahihiya. Extension ito ng bahay mo sa GMA.”
Dito muling binanggit ni Vice ang pagsasanib-puwersa ng ABS-CBN at GMA-7 para sa ilang collaborations, kabilang ang pag-ere ng It's Showtime sa GTV, isang GMA-affiliated free TV channel.
“Ito ang magandang nangyari sa pagpasok natin sa GTV. Ang dami nating mga bagong kaibigan. Na-extend.
“Lumaki nang lumaki, tapos nae-expose na ‘yung madlang people sa mga talents nila, at tayo, nakikita rin tayo ng audience ng GTV. Nakakatuwa. Share-share!” ani Vice.
Sa interbyuhan portion, naitanong ni Vice sa actress na kung sakaling mabigyan ng pagkakataong magkaroon ng project sa ABS-CBN, sino'ng Kapamilya star ang gusto niyang makatrabaho?
Sagot ni Bianca, “ultimate dream” leading man niya si Piolo Pascual.
Sabi naman ni Kim, “Mahaba ang pila ru’n, Bianca!”
Paliwanag ni Bianca kung bakit gusto niya si Piolo, “Kasi sobrang idol din siya ng lola ko.
“'Pag makatrabaho ko siya, mahihingan ko ng video greet ang lola ko.”
Bago si Bianca, marami na ring Kapuso stars ang naging guest sa It's Showtime, gaya nina Julie Anne San Jose, Pokwang, Gabbi Garcia, Rayver Cruz at Richard Yap.
Comments