ni Julie Bonifacio @Winner | September 10, 2024
Dramatiko ang pag-akyat sa entablado ni Ronnie Lazaro nang tanggapin niya ang Best Actor award sa 2024 Sinag Maynila International Film Festival (2024 SMIFF) na ginanap sa makasaysayang Metropolitan Theatre sa Maynila noong nakaraang Linggo.
Nanalo si Ronnie ng Best Actor para sa pelikulang The Gospel of the Beast (TGOTB).
Pagdating sa gitna ng entablado, idinampi ni Ronnie ang isang palad sa sahig ng stage saka nagbigay ng kanyang acceptance speech. Inalala ni Ronnie na ang entabladong iyon sa MET ay isa sa mga pinagtanghalan niya bilang aktor ng mga dula ng Bulwagang
Gantimpala. Ngayon ay isa na siyang artista sa pelikula at nanalo pa ng award.
Sa talumpati ni Ronnie, “Maraming salamat po sa bumubuo ng Sinag Manila (Maynila). Maraming salamat, Direk Sheron Dayoc dahil… wow!
“Kay Jansen, ‘di ko maintindihan, pero… wow! Ahhh, maraming salamat at mabuhay sa mga regional filmmakers. Gawin lang natin ‘to, gawin lang natin ‘to.
“Kailangan pa nating ligawan ang ating mga manonood. Kailangan natin silang ligawan, kailangang malaman nila na may ginagawa tayong magandang mga pelikula ngayon.”
Pagkatapos niyang bumaba ng entablado at umupo sa upuan ng audience katabi ang kanyang anak at misis, nalaman namin ang pagkagulat at pagkalito ni Ronnie nang mahilingan siyang lumabas ng teatro para mainterbyu.
“I’m very happy. The recognition coming from Sinag Manila (Maynila) and, uh, I’m a bit confused at the same because I won Best Supporting for this in Urian, but as a supporting actor.
“When they announced Jansen, which I’m glad about… I’m happy for him to win. I guess that’s it. But for Best Actor, wow! Okay.
“Maraming salamat 'coz I don’t want to, I’m not really the type who would want to leave my own chair for this kind of stuff that, uh, yeah... yeah.
“Maybe the performance is too big for supporting Sinag Manila’s jury so, they put me in that category. Thank you.”
Ang tinutukoy na “Jansen” ni Ronnie ay ang co-star niya na si Jansen Magpusa na nanalo rin bilang Best Supporting Actor sa Sinag Maynila 2024.
Wala rin daw ideya si Ronnie na nominado siya para sa anumang kategorya noong gabing iyon. May nag-imbita lang daw sa kanya na dumalo sa Sinag Maynila Gabi ng Parangal.
Nominado rin sa Best Actor sina Tony Labrusca (What You Did), Bryan Wong (Banjo), at L.A. Santos (Maple Leaf Dreams).
Nagpaliwanag naman ang isa sa mga judges sa full-length category na si Bibeth Orteza kung bakit sa Best Actor category nominado si Ronnie at sa Best Supporting Actor naman si Jansen, na parehong nasa TGOTB.
Simula pa lang daw kasi ng pelikula, nandoon na si Ronnie. Buo raw kasi ang role nito at pinag-usapan talaga nila ang bagay na ito kasama ang kanyang co-juries na sina Lav Diaz at Ramona Diaz.
SI Rebecca Chuaunsu ang itinanghal na Best Actress sa 6th Sinag Maynila Int’l. Filmfest para sa kanyang pagganap sa Her Locket (HL).
Based on Rebecca’s personal life, ang kuwento ng HL ay tumalakay tungkol sa pagpapatawad at pagbangon.
Kaya naman ang rason na ibinigay sa pagkakapanalo ni Rebecca ay ‘di na niya kailangang iarte pa ang kanyang role dahil siya na nga mismo ang karakter niya sa pelikula.
Winner din ang HL ng pito pang awards — Best Film, Best Director (J.E. Tiglao), Best Ensemble, Best Supporting Actress (Elora Españo), Best Cinematography (Jag Concepcion), Best Screenplay (Maze Miranda and J.E. Tiglao), at Best Production Design (James Rosendal).
Dalawa lang ang nominado sa Best Actress — si Rebecca at si Kira Balinger (Maple Leaf Dreams).
Si Bryan Wong (Banjo) ang nanalo sa kategoryang Best Editing. Tinalo niya si Beng Bandong (What You Did) at Lawrence Ang (The Gospel of the Beast). Haping-happy si Bryan na lumipad pa mula Sarangani, General Santos kasama ang ilan pa sa kanyang production team.
And last but not the least, napanalunan ng Talahib ni Direk Alvin Yapan and produced by Feast Foundation ang People’s Choice Award.
Napili ang Talahib batay sa lumabas na record na may pinakamaraming nanood sa apat na araw na pagpalabas sa mga sinehan during the Sinag Maynila Int’l. Filmfest.
In short, ang Talahib ang top-grosser ng prestihiyosong international filmfest. Taray, ‘di ba?
Napatunayan ng Talahib na may captive audience talaga ang slasher films sa Pilipinas.
Ang mga nanalo naman sa Short Film Category ay ang mga sumusunod: Best Short Film ang As The Moth Flies (ATMF) by Gayle Oblea; 2nd Best Short Film ang Bisan Abo Wala Bilin (Even Ashes, Nothing Remains) by Kyd Torato; at 3rd Best Short Film Ang Maniniyot ni Papa Jisos (Father Jisos’ Photographer) by Franky Arrocena.
Sa Documentary Category, wagi bilang Best Documentary ang Ino by Raniel Semana; Special Jury Prize ang Pag-Ibig Ang Mananaig (Love Will Prevail) by Jenina Denise A. Domingo at ang Ghosts of Kalantiyaw by Chuck Escasa.
Binigyang-diin ng Sinag Maynila founder at Solar Entertainment President na si Wilson Tieng na ang mga finalists sa Sinag Maynila Int’l. Filmfest ay pinili mula sa hundreds of entries, and are representative of the current national cinema landscape mula sa iba’t ibang bahagi ng bansa.
Pinasalamatan din ng tinaguriang “Father” ng Sinag Maynila na si Wilson ang mga nanood sa mga sinehan sa kabila ng masamang panahon, pati na rin ang Sinag Maynila co-founder at Festival Director na si Brillante Mendoza, ang “lovers of Filipino independent films.”
Ayon pa kay Cannes International Film Festival Best Director, “Napakahalaga po sa amin na nakikiisa kayo sa indie filmmakers na naging passion na ang paggawa ng pelikula. Hindi lamang dugo, pawis ang ibinubuhos sa paglikha, kundi pati ang kinabukasan, minsan ay kailangang itaya para maisakatuparan ang mga pangarap.”
Sinag Maynila 2024 is supported by the City of Manila, Department of Tourism, Culture & Arts Office of Manila (DTCAM), the Film Development Council of the Philippines and the National Commission for Culture and the Arts.
Comments