ni Erlinda Rapadas @Teka Nga | Feb. 8, 2025
Photo: Max Collins at Sofia Andres - Instagram
Pinag-uusapan ngayon sa social media ang ginawa ni Sofia Andres sa larawan ni Max Collins na lumabas online.
Magkakasama sina Heart Evangelista, Sarah Lahbati, Max Collins at Sofia Andres sa naturang larawan. Ini-repost ito ni Sofia sa kanyang IG Story, pero tinakpan niya ng blue heart ang mukha ni Max Collins.
Agad itong napansin ng mga netizens, kaya nag-react ang mga fans ni Max. Inakala nilang insecure raw si Sofia sa ganda ng huli, pero ang totoong dahilan pala ay may old issue na sina Sofia at Max na nag-ugat sa dating stylist ni Sofia na si Steph Aparici.
Ang nasabing stylist daw ay lumipat na kay Max Collins, kaya minasama ito ni Sofia Andres. Feeling ni Sofia ay sinulot ni Max ang kanyang dating stylist, kaya bitter-bitter-an siya ngayon.
Gaya rin ito ng naging isyu noon sa pagitan nina Heart Evangelista at Pia Wurtzbach. Ang dating stylist-glam team ni Heart na ilang taon niyang nakasama sa mga fashion events abroad ay lumipat din kay Pia.
Dinamdam ito nang husto ni Heart dahil itinuring na niyang pamilya ang kanyang glam team. Kaya patuloy pa rin ang patutsada niya sa social media sa mga taong ‘nanunulot’ at sa mga walang utang na loob.
Well, tiyak na hindi rin matutuwa si Sofia Andres sa balitang nasa New York ngayon si Max Collins at rumarampa sa Fashion Week. At hindi siya apektado sa ginawa ni Sofia Andres sa kanyang larawan na tinakpan ng puso. Hindi siya insecure kahit kanino.
ANIM na buwan na lang at matutupad na ang pangarap ng Kapuso actress na si Shaira Diaz na maikasal sa kanyang long-time boyfriend na si Edgar Allan Guzman (EA). Labindalawang taon na silang magkarelasyon at sinuportahan nila ang career ng isa’t isa.
Hindi minadali ni EA si Shaira na magpakasal, lalo na’t alam niyang marami pa itong pangarap sa buhay. Nagtapos muna ng kanyang college degree si Shaira at nagkaroon ng break bilang isa sa mga hosts ng morning show ng GMA-7 na Unang Hirit (UH).
Naging leading lady din si Shaira ni Ruru Madrid sa action seryeng Lolong.
Naging abala sa taping ng sequel ng Lolong si Shaira Diaz, pero nagagawa pa rin niyang asikasuhin ang wedding preparations para sa nalalapit nilang kasal ni EA sa August.
Sa Cavite gagawin ang kasal at doon din ang reception. Korean drama-inspired ang kanilang kasal dahil K-drama fanatic si Shaira. Sa Korea rin binili ang kanyang wedding gown.
Inaayos na nina EA at Shaira ang kanilang wedding entourage at ang mga tatayong ninong/ninang sa kasal, pati na rin ang mga kaibigang iimbitahin.
Ilan sa mga magiging ninong ay sina Boy Abunda at Arnold Clavio. Tiyak na imbitado rin ang mga hosts ng UH at mga co-stars nila ni Ruru Madrid sa Lolong.
DALAWANG taon nang nagli-live-in sina Jake Vargas at Inah de Belen, na pareho nang 30 pataas ang edad. Kaya nang may lumabas na larawan nila sa social media na parehong nakasuot ng puti, may mga nag-akala na nagpakasal na sina Jake at Inah.
Sunud-sunod ang nagpaabot ng pagbati sa kanila. Pero, hindi pala iyon wedding picture, kundi kuha lang nang dumalo sina Jake at Inah sa GMA Gala Night.
Mukhang hindi pa sa edad nilang ito ang pagpapakasal. Hindi pa sila handa sa mas malaking responsibilidad. Maaaring may iba pa silang planong gawin para sa kanilang future.
Sa pagkakaalam namin, nag-venture sina Jake Vargas at Inah de Belen sa pagtatayo ng sarili nilang movie production at pagpo-produce ng pelikula. Sa larangang ito nila nais luminya.
Samantala, si Jake ay regular na napapanood sa sitcom na Pepito Manaloto: Tuloy ang Kwento.
May mga nagtatanong naman kung bakit hindi naisasama si Jake Vargas sa mga bagong serye ng GMA-7 gayung magaling naman siyang umarte?
Sayang naman ang talento ni Jake kung sa sitcom lang siya napapanood. Puwedeng-puwede siyang bigyan ng role sa seryeng Mga Batang Riles at swak siyang kakampi ni Miguel Tanfelix.
Comments