ni Maestra Estrellia de Luna @Panaginip Gabay ng Buhay | September 14, 2024
Analisahin natin ang panaginip na ipinadala ni Norma ng Catanduanes.
Dear Maestra,
Napanaginipan ko na pinalitan ko lahat ng punda ng unan ko. Nang may bigla akong nakita na nagkalat na mga papel sa sahig, agad ko itong pinunit at tinapon sa basurahan.
Ano ang ibig sabihin ng panaginip ko?
Naghihintay,
Norma
Sa iyo, Norma,
Ang ibig sabihin ng panaginip mo na pinalitan mo lahat ng mga punda mo ay magiging mayaman ka pagtanda mo.
Lahat ng kaginhawaan sa buhay ay iyong mararanasan. Isa pa, magiging maligaya ka rin sa piling ng iyong pamilya, at mamahalin ka nila hanggang sa huling sandali ng iyong buhay.
Samantala, ang may nakita kang mga papel sa sahig, agad mo itong pinunit at tinapon sa basurahan ay nagpapahiwatig na matatapos na ang mga alalahanin mo sa buhay. Hindi ka na mababalisa, sapagkat magkakaroon na ng kalutasan ang lahat ng iyong suliranin. Magiging payapa na rin ang iyong puso’t isipan.
Matapat na sumasaiyo,
Maestra Estrellia de Luna
Comments