ni Pablo Hernandez @Prangkahan | July 4, 2024
LUNDAGAN SA TUWA ANG MGA ‘BUWAYA’ SA GOBYERNO KASI TUMATAGINTING NA P6.356-T BUDGET NEXT YEAR -- Tumataginting na P6.356 trillion ang nais ni Pres. Bongbong Marcos (PBBM) na maging national budget ng administrasyon sa year 2025.
Sa laki ng national budget na ‘yan next year, tiyak naglulundagan na naman sa tuwa ang mga ‘buwaya’ sa gobyerno, boom!
XXX
MAY AWTORIDAD KAYANG MAGKAROON NG LAKAS NG LOOB NA IPATURO KAY EX-P-DUTERTE ANG PINAGTATAGUAN NI QUIBOLOY -- Sabi ni ex-P-Duterte ay alam daw niya kung saan nagtatago ang puganteng friend niya na si Pastor Apollo Quiboloy na naging wanted sa batas dahil sa mga kasong child sexual abuse at child sex trafficking.
Ang tanong: May awtoridad naman kayang magkaroon ng lakas ng loob na gisahin si ex-P-Duterte para ituro ang pinagtataguan ni Quiboloy? Abangan!
XXX
SEN. RISA TATAKBONG PRESIDENTE, SEN. RAFFY TULFO HINDI, KAYA DAPAT ANG SENADORA ANG ISAMA SA PRESIDENTIAL SURVEY, ‘ WAG ANG SENADOR -- Nagpahiwatig si opposition leader, Sen. Risa Hontiveros na kumandidato sa pagka-pangulo sa 2028 election.
Iyang si Sen. Risa ang dapat isama ng mga survey firm sa presidential survey kasi nga nagpahiwatig na siyang may posilibidad na kumandidato sa pagka-presidente at hindi si
Sen. Raffy Tulfo na nakiusap na sa mga survey firm na huwag nang isama ang kanyang pangalan dahil hindi naman daw siya nag-aambisyong maging pangulo ng bansa, period!
XXX
HARRY ROQUE, SUPALPAL INABOT KAY VP SARA -- Supalpal ang inabot ni former Presidential spokesman Harry Roque kay Vice Pres. Sara Duterte-Carpio.
Matapos kasing kumalas si VP Sara bilang miyembro ng gabinete ni PBBM ay sinabi ni Roque na ang bise-presidente na raw ang mamumuno sa oposisyon, pero kinontra ito ni VP Sara na nagsabing ayaw niyang maging opposition leader laban sa Marcos admin, boom!