ni Julie Bonifacio - @Winner | August 10, 2022
Tagumpay ang naging prank ng Magandang Buhay kay Jane de Leon, ang bida ng paparating na seryeng Mars Ravelo's Darna.
Nitong Lunes, napasigaw, napayakap at halos maiyak si Jane sa kanyang ina dahil sa butiki na isa sa kanyang mga kinakatakutan.
"Ako po, humahawak po ako ng ipis, ng daga, lahat po, huwag lang po butiki," sabi ni Jane pagkatapos ng prank sa kanya.
"Kasi nagpi-fishing kami ni Papa. Kapag nagpi-fishing kami ay nagbubungkal din po kami ng uod, ganyan, pampain. Kapag wala na po kaming makitang bulate o uod, pinuputol po namin 'yung buntot ng butiki. Noong mga panahon po na 'yun ay hindi pa naman ako takot," say pa ni Jane.
Kuwento pa ng aktres, nagsimula ang matinding takot niya sa butiki nang minsan itong pumasok sa kanyang suot na damit.
"Nandoon po siya sa isang vase, tapos may stick po ako, tinutusok ko po siyang ganu'n, biglang dumiretso siya sa stick at pumasok sa loob ng (damit ko). Na-trauma po ako,” bulalas pa ni Jane.
Sa Lunes, Agosto 15, magsisimula na ang pagpapakita ng tapang at lakas ni De Leon bilang si Darna.
Samantala, on the day na nag-guest sa Magandang Buhay si Jane ay siya ring simula ni Asia’s Songbird Regine Velasquez bilang isa sa mga official hosts ng Kapamilya morning show.
Sa kanyang speech, pinasalamatan ni Regine ang kanyang mga co-hosts na sina Jolina Magdangal at Melai Cantiveros.
Ayon sa singer, magkahalong kaba at saya ang nararamdaman niya ngayong opisyal na siyang parte ng Magandang Buhay.
"Kinakabahan ako, hindi ko alam. Pang-ilang beses ko na rito pero for some reason since I'm officially going to be part of Magandang Buhay, today I'm so nervous. Kabadung-kabado talaga ako.
"Siyempre, I'm very excited. But I'm just a little nervous. Siguro kasi, kasama 'yun... Siyempre kasi, 'pag naging host ka, there's a certain responsibility. But I'm happy. I'm very, very happy to be part finally of Magandang Buhay," lahad pa ni Regine.
Napapanood ang Magandang Buhay tuwing umaga sa Kapamilya Channel, Kapamilya Online Live, TV5, A2Z Channel 11, and iWantTFC.
Comentarios