ni Jordan Santoyo (OJT) @Life & Style | Mar. 15, 2025
Sa mundo ng negosyo kung saan madalas lalaki ang nangingibabaw, patuloy na pinatunayan ng mga kababaihan na kaya rin nilang manguna at magtagumpay.Ngayong Women’s Month, kilalanin natin ang ilang mga kababaihan na nagtagumpay sa negosyo at nagbukas rin ng iba’t ibang pinto para sa mga kababaihan.
Mula sa simpleng kusina hanggang sa mga pamilihan sa buong bansa, ganito nagsimula si Corazon D. Ong, founder ng CDO Foodsphere. Nais lamang niya dati na tiyakin na masustansiya at masarap ang pagkain na kakainin ng kanyang pamilya at du’n siya nagsimulang gumawa ng homemade meat products.
Hindi naging madali ang daan patungo sa tagumpay ni Mrs. Ong, lalo na’t isang malaking sunog ang muntik nang tumapos sa kanyang pangarap, subalit kesa na sumuko, ginamit niya ito bilang inspirasyon upang lalo pang palaguin ang kanyang negosyo. Ngayon, ang CDO ay isa na sa pinakamalaking kumpanya ng processed food dito sa ‘Pinas, patunay na ang malasakit sa pamilya ay maaaring maging daan tugon sa tagumpay.
Kung tungkol sa pagkain ang patungkol kay Ms. Ong, ibahin naman natin ang isa pang nagpakitang-gilas din sa lahat. Ang aking tinutukoy ay walang iba kundi si Dr. Victoria “Vicki” Belo, hindi lang tungkol sa kagandahan ang kanyang negosyo, ito rin ay pagpapalakas ng kumpiyansa ng bawat Pilipino. Mula sa isang maliit na clinic sa Makati, itinayo niya ang Belo Medical Group, na ngayon ay isa sa pinakaprestihiyosong beauty at cosmetic surgery centers sa ating bansa.
Nakaka-amaze, hindi ba? Sa isang industriya, kung saan mahalaga ang pagpapahalaga sa sarili, tinulungan niya rin ang maraming Pilipino, lalo na ang mga kababaihan na yakapin ang kanilang kagandahan at magkaroon ng self-esteem.
Pagdating naman sa larangan ng disenyo at damit, pinatunayan ni Zarah Juan na hindi lang istilo ang mahalaga kundi pati ang kuwento sa likod ng bawat produkto. Mula sa paglipad bilang flight attendant, ginamit niya ang kanyang malikhaing kaisipan upang lumikha ng eco-friendly at cultural-inspired na mga bag.
Samantala, hindi rin nagpahuli si Arielle Escalona, na sa kanyang 20’s ay napalawak niya agad negosyo ng kanilang pamilya – ang Fruit magic at ipinakilala sa merkado ang Pure Nectar, isang brand ng natural fruit. Sa pagpupursigi ay naitaguyod niya ang isang matagumpay na negosyo sa larangan ng fitness and wellness, at nakilala rin ang Pure Nectar hindi lang sa Pilipinas, kundi pati na rin sa ibang bansa.
Ang kanilang tagumpay ay isa lamang patunay na walang imposible sa isang babaeng may pangarap.
Sa pamamagitan ng sipag, tiyaga, determinasyon at tiwala sa sarili, kayang-kaya nating abutin ang ating mga pangarap kahit ano pa ang iyong kasarian.
Tandaan, babae ka, hindi babae lang. Kaya mula sa pahayagang BULGAR, Happy National Women’s Month! Nawa’y patuloy kayong mangarap at gawin ang iyong mga nais!
Comentários