ni Erlinda Rapadas @Teka Nga | Jan. 10, 2025
Photo: Keempee De Leon at Joey De Leon - FB
Hindi napigil ni Keempee de Leon ang maiyak nang ikuwento niya sa ilang media friends kung paano sila nagkabati ng kanyang amang si Joey de Leon. Limang taon na hindi sila nagkita at nagkausap na mag-ama. Malaki ang hinanakit ni Kimpoy sa kanyang dad na si Joey de Leon, kaya natiis niyang lumayo at hindi magpakita sa loob ng 5 taon.
Maging sa kanyang kapatid na si Cheenee ay pinutol din ni Keempee ang komunikasyon.
Hanggang sa dumating ang panahon na na-realize ni Keempee ang kanyang pagkakamali. Masyado niyang pinairal ang kanyang pride at hindi magawang magpakumbaba.
Pero noong June 2024, sa Father’s Day celebration ng Eat… Bulaga! (EB!), bigla siyang sumipot sa studio at binati ang kanyang dad na si Joey de Leon. Ikinalulat ito ng kanyang dad, at sila ay nagyakapan at nagkaiyakan. Humingi ng tawad si Keempee sa kanyang mga naging pagkakamali at kasalanan.
Mula noon ay nagkaroon na ng regular na komunikasyon sina Kimpoy at Joey. Lubos na naunawaan ni Keempee ang kanyang mga pagkakamali. Masaya siya na muling naramdaman na may pamilya siyang nagmamahal sa kanya.
Sabi nga ni Keempee, napatawad na rin niya ang mga taong nakasamaan ng loob. Ngayon ay bumabalik ang magandang direksiyon ng kanyang career. Kasama siya sa bagong serye ng GMA-7, ang Prinsesa Ng City Jail (PNCJ).
Labis na ikinalungkot ng mga anak ni Dina Bonnevie na sina Danica at Oyo Sotto ang pagpanaw ng kanilang stepdad na si DA Undersecretary DV Savellano, na dating naging gobernador ng Ilocos Sur. He’s only 65 years old, at 62 naman si Dina.
Ayon kay Danica, napakabait at chill na stepdad si DV, kaya napalapit sa kanilang magkapatid. Nakapagbakasyon pa sa Japan sina Dina at DV Savellano during the holiday season.
Samantala, bumuhos ang pakikiramay kay Dina mula sa kanyang mga kasamahan sa showbiz. Ilan sa mga unang dumating sa burol ay sina Amy Austria, Isabel Rivas, Melissa Mendez, atbp..
Hindi madali kay Ms. Dina ang pagpanaw ng kanyang mister.
Ganunpaman, sinikap niyang magpakatatag at tanggapin ang lahat. Maraming kaibigan ang nakiramay kay Dina ngayong biyuda na siya.
Anyway, may career pa naman siya, at naririyan ang kanyang mga anak at apo na handa siyang damayan.
Fans, kahit inip na inip na…
MAINE AT ARJO, ‘DI PA RIN MAGKAKA-BABY NGAYONG 2025
Naiinip na ang mga fans nina Maine Mendoza at Cong. Arjo Atayde na nag-aabang ng kanilang announcement tungkol sa kanilang baby project ngayong 2025. Lagi na lang itong itinatanong sa kanila ng kanilang mga tagahanga. At ilang taon na rin silang nag-aabang at naghihintay.
Pero parehong abala ngayon sina Maine at Cong. Arjo. Si Maine ay patuloy sa pagho-host sa Eat… Bulaga! (EB!), at si Arjo Atayde ay busy sa kanyang pagiging public servant at sa paggawa ng pelikula. Pero ready naman sila kung sakaling ibibigay na sa kanila ang kanilang “little angel”.
Maging ang malalapit nilang kaibigan at pamilya ay excited nang makita ang kanilang baby.
Pero mukhang hindi pa ngayong 2025 magkakaroon ng katuparan ang baby project nina Maine at Cong. Arjo. Ayon sa prediction ng isang psychic, hindi pa mabubuntis si Maine ngayong Year of the Wooden Snake. Kaya walang aasahan ang mga fans na may makikita na silang little Maine o little Arjo.
Well, sina Megan Young nga at Mikael Daez ay 13 years bago na-grant ang wish na magkaanak. Darating sa tamang panahon ang baby project nina Maine Mendoza at Cong. Arjo Atayde.
Comments