@Buti na lang may SSS | November 27, 2022
Dear SSS,
Magandang araw! Ako ay SSS pensioner sa Bacoor, Cavite. Nais kong itanong kung paano mag-apply para sa three-month advance pension para sa mga naapektuhan ng Super Typhoon ‘Paeng’, kamakailan. - Lola Soledad
Sagot
Mabuting araw sa iyo, Lola Soledad!
Noong nakaraang Linggo ay ating tinalakay ang Calamity Loan Assistance Program (CLAP) na bahagi ng SSS Calamity Assistance Package na binuksan noong Nobyembre 17, 2022 para tulungan ang mga miyembro at pensyonado na naapektuhan ng Severe Tropical Storm ‘Paeng’ noong Oktubre.
Sa panahon ng mga kalamidad, palaging handang magbigay ang SSS ng tulong hindi lamang sa mga miyembro nito kundi pati sa mga pensyonado. Kaya ating tatalakayin ngayon ang ikalawang bahagi ng SSS Calamity Assistance Package. Ito ay ang Three-month advance pension para sa lahat ng mga SSS at Employee’s Compensation (EC) pensioners.
Kwalipikado sa nasabing programa ang mga pensyonado na naninirahan sa mga lugar na idineklarang calamity areas ng National Disaster and Risk Reduction Management Council (NDRRMC) na kinabibilangan ng mga lalawigan ng Cavite, Laguna, Batangas, Rizal, Quezon, Albay, Camarines Norte, Camarines Sur, Sorsogon, Catanduanes, Masbate, Aklan, Antique, Capiz, Guimaras, Iloilo, Negros Occidental, Basilan, Lanao del Sur, Tawi-Tawi, Sulu, Maguidanao del Norte at Maguindanao del Sur.
Kasama ang Cagayan, lalo na sa mga bayan ng Amulung, Enrile at Tuguegarao. Sa Marinduque, ito ay ang mga bayan ng Mogpog, Santa Cruz at Buenavista, at sa Cotabato ay ang mga bayan ng Pigcawayan, Libungan at Midsayap.
Dagdag pa rito ang Muntinlupa City, Calbayog sa Samar, Sirawai sa Zamboanga del Norte at Zamboanga City sa Zamboanga del Sur.
Sa ilalim ng Three-month advance pension, paunang ibinibigay ng SSS ang tatlong buwang pensyon ng isang pensyonado. Layunin ng SSS na makatulong sa dagliang pangangailangan ng mga ito, tulad ng pagbili ng kanilang mga gamot at pagkain. Lola Soledad, halimbawa ay kung maaprubahan ngayong Nobyembre ang aplikasyon ninyo, maaari mong makuha ang inyong pensyon para sa mga buwan ng Disyembre 2022 hanggang Pebrero 2023.
Samantala, hindi maaaring mag-apply ang mga pensyonado na may kasalukuyang pagkakautang sa ilalim ng Pension Loan Program.
Para mag-apply, kinakailangan lamang punan ang Application for Assistance Due to Calamity/Disaster Form na maaari n’yong i-download sa aming website (www.sss.gov.ph). Dapat sertipikahan ng Barangay Chairman ng inyong lugar ang form bilang patunay na kayo ay naninirahan sa apektadong lugar. Subalit, kung hindi ito nalagdaan ng inyong Barangay Chairman, maaari kayong magsumite ng sertipikasyon mula sa Department of Social Welfare and Development (DSWD) o NDRRMC na kayo’y naninirahan sa isa sa ating mga nabanggit na apektadong lugar. Maaari n’yo namang isumite ang accomplished form sa pinakamalapit na sangay ng SSS.
Ipadadala ang tseke para sa nasabing benepisyo sa sangay ng SSS kung saan ka nag-file. Maaari itong i-claim sa nasabing SSS branch. Subalit kung makalipas ang 10-araw at hindi ito na-claim, ipadadala ng SSS ang tseke sa iyong mailing address sa pamamagitan ng koreo.
Hindi ito pautang kaya wala kayong babayaran dito. Subalit, kung i-advance na sa inyo, Lola Soledad ang inyong pensyon, halimbawa ay para sa mga buwan ng Disyembre 2022 hanggang Pebrero 2023, ang muling pagtanggap n’yo ng buwanang pensyon ay magsisimulang muli sa buwan ng Marso 2023.
***
Bukas pa rin ang Calamity Assistance Package (CAP) para sa mga miyembro at pensyonado na naapektuhan ng Super Typhoon ‘Karding.’ Tatanggap ang SSS ng aplikasyon para sa CAP hanggang Enero 6, 2023. Ito ay binubuo ng Calamity Loan Assistance Program (CLAP) para sa SSS members at ang Three-month advance pension para sa lahat ng SSS at Employee’s Compensation (EC) pensioners.
Ang CAP ay magbibigay ng tulong-pinansyal sa mga miyembro at pensyonado sa lalawigan ng Nueva Ecija at sa mga bayan ng Dingalan sa Aurora, Macabebe sa Pampanga at San Miguel sa Bulacan.
Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.
Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.
Comments