ni Atty. Rodge Gutierrez @Mr. 1-Rider | Marso 23, 2024
Natakda nang ilabas ng Metro Manila Council (MMC) ang isang resolusyon na naglalayong itakda ang kaukulang multa para sa mga lalabag na e-bikes at at e-trikes sa Metro Manila, lalo na ang mga dumaraan sa major thoroughfares.
Ayon sa MMC, kasalukuyan nang binabalangkas ang naturang resolusyon at nakatakda nang ihayag sa susunod na linggo kung ano ang mga parusang ipapataw sa mga e-motor vehicle na lalabag sa batas-trapiko.
Nagsagawa ng Technical Working Group (TWG) meeting ang halos lahat ng nakakasakop sa mga pangunahing kalsada sa Metro Manila, kasama ang Department of Transportation (DOTr), Land Transportation Office (LTO), Land Transportation Franchising and Regulatory Board (LTFRB).
Napag-alaman na mayroong umiiral na LTO circular noon pang 2021 na may panuntunan hinggil sa mga gumagamit ng e-bikes at e-trikes, ngunit walang kaukulang halaga ng multa para sa mga lumabag sa batas-trapiko.
Kasama sa bagong panuntunan na nabuo ng MMC ang tricycle at kuliglig dahil marami sa kanila ang nakikipagpatintero rin sa mga national road, lalo na sa madaling-araw dahil nagkakarga sila ng mga pinamili ng mga tindero mula sa Divisoria patungo sa iba’t ibang palengke sa Metro Manila.
Inaasahang ang pagkakaroon ng karampatang multa para sa mga sasakyang nabanggit ay maglalagay sa ayos upang maibsan na ang walang humpay na paggamit ng mga nabanggit na sasakyan sa mga main road.
Karamihan naman sa mga lokal na pamahalaan ay may kani-kanyang resolusyon tungkol sa napakatagal nang problemang ito, ngunit dahil sa kani-kanya ang sistema ay tila walang puwersa ang mga panuntunan at hindi nakaanunsyo.
Hindi tulad ng MMC na mas malawak ang pagpapakalat ng mga impormasyon kaya inaasahang mas marami na sa mga nabanggit na sasakyan ang susunod.
Kinonsidera naman umano ang probisyon nila hinggil dito dahil meron kasing LGUs na wala pang resolusyon at ngayon pa lang gagawa, makaraang pumutok na ang Metro Manila Council resolution.
Tumaas na kasi ang bilang ng mga nagrereklamo laban sa e-bikes at e-trikes na nagsasalimbayan sa pagdaan sa mga national road na lubhang napakadelikado dahil walang mga protective gears.
Ayon sa MMC, hindi naman umano nila dini-discriminate ang mga nabanggit na sasakyan kundi inilalagay lamang sa ayos para sa kaligtasan ng lahat.
Nauna rito, nag-anunsyo na ang LTO hinggil sa registration ng e-bikes at e-trikes at inoobliga na silang kumuha ng rehistro upang mapatawan din ng parusa kung may paglabag.
Maganda ang hakbanging ito ng MMC dahil maraming enforcer na ginagawang gatasan lamang ang mga sasakyang ito, lalo na ‘yung maraming karga dahil sa wala ngang nakatakdang parusa at multa sakaling mahuli sila sa kahabaan ng EDSA ‘pag madaling-araw.
Naoobliga na lamang mag-imbento ng parusang ipapataw ang mga enforcer dahil wala ngang panuntunan, pero ngayong ilalabas na ng MMC ang guidelines at karampatang multa ay hindi na rin mag-iimbento ng ipapataw na violation ang mga enforcer dahil mayroon na.
Isa rin sa dapat tutukan ng MMC ay ang mga dealer ng e-trikes at bikes sa kani-kanilang nasasakupan upang tumulong na hikayatin na magparehistro ang mga bumibili ng e-bike at e-trike.
Ang problema kasi sa mga dealer ng e-trike at e-bike ay ginagawa nilang pangkumbinsi para bumili ng e-bike ang isang customer gamit ang mga pananalitang ‘hindi na kailangan ng lisensya, rehistro at mabahong helmet — kumbaga walang huli kaya marami ang naeengganyong bumili.
Dapat ay isama rin sa meeting ng MMC ang mga dealer na ito para tigilan na nila ang pang-uuto basta makabenta lang.
Kaya sa mga nagmamaneho ng e-bike at e-trike, tapos na ang maliligayang araw ninyo na hindi kayo pinapansin sa kalye dahil papatulan na kayo ngayon, kaya maging responsable at alamin kung ano ba ang tamang panuntunan na ilalabas ng MMC.
SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.
Comments