ni Atty. Persida Rueda-Acosta @Magtanong Kay Attorney | September 7, 2023
Dear Chief Acosta,
Kami ng aking live-in partner ay may isang anak na babae na sampung taong gulang na. Hanggang ngayon ay hindi pa rin kami ikinakasal ng aking live-in partner. Gusto sana naming matigil na ang pang-aasar ng mga kalaro ng aming anak na nagsasabing siya ay illegitimate child sapagkat siya ay isinilang mula sa hindi kasal na mga magulang. May paraan kaya para maayos namin ito? - Marites
Dear Marites,
Para sa iyong kaalaman, mayroong batas na nakasasaklaw sa iyong katanungan. Ayon sa Articles 177, 178, 179, at 180 ng ating Family Code of the Philippines:
“Art. 177. Children conceived and born outside of wedlock of parents who, at the time of conception of the former, were not disqualified by any impediment to marry each other, or were so disqualified only because either or both of them were below eighteen (18) years of age, may be legitimated.
Art. 178. Legitimation shall take place by a subsequent valid marriage between parents. The annulment of a voidable marriage shall not affect the legitimation.
Art. 179. Legitimated children shall enjoy the same rights as legitimate children.
Art. 180. The effects of legitimation shall retroact to the time of the child’s birth.”
Sang-ayon sa nabanggit, ang mga batang nabuo at ipinanganak mula sa hindi ikinasal na mga magulang, kung saan ang mga magulang na ito ay walang impediment na magpakasal sa isa’t isa, o kung ang dahilan kung bakit hindi sila kaagad ikinasal ay dahil sila ay mga menor-de-edad pa lamang, ay maaaring maging legitimated.
Ang legitimation na tinatawag sa ating batas ay mangyayari sa oras na magpakasal ang mga magulang ng bata, at ang epekto ng legitimation ay babalik mula sa oras na ipinanganak ang bata kung saan magkakaroon din siya ng mga karapatan bilang isang legitimate child.
Sa inyong sitwasyon, maaari kayong magpakasal ng iyong live-in partner kung kayo ay walang impediment para pakasalan ang isa’t isa, upang magkaroon ang inyong anak ng mga karapatan ng isang legitimate child.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
Comments