ni Maestro Honorio Ong @Kapalaran Ayon Sa Palad | September 13, 2024
KATANUNGAN
Paano ba malalaman kung mayaman ang mapapangasawa ng isang tao? Naitanong ko ‘yun, dahil may manliligaw kasi ako ngayon na isang Chinese na mayaman.
Maestro, gusto sanang malaman kung siya na kaya ang mapapangasawa ko kahit na ramdam ko na hindi naman siya masyadong seryoso?
KASAGUTAN
Unang-una, kapag ang birth date ng isang babae ay 5, 14, at 23, lalo na kung ito ay August 23 o October 14, sila ang tipikal o pangkaraniwan na nakakapag-asawa ng mayaman. Mas makukumpirma pa ito kung maganda o tuwid ang Fate Line (Drawing A. at B. F-F arrow a.) na sinabayan din ng tuwid at magandang Guhit ng Lalaki o Influence Line na tinatawag din nating Guhit ng Magaling o Guhit ng Mayamang Lalaki (Drawing A. at B. K-K arrow b.) lalo na kung nagkataon pang tuwid ang Head Line (Drawing A. at B. H-H arrow c.) sa kaliwa at kanang palad ng nasabing babae.
Kapag may ganyan ang isang tao, tiyak na siya ay makakapag-asawa ng mayaman. Tulad ng nakikita ko sa palad mo, ikaw ay nagtataglay ng tuwid na Fate Line (arrow a.), na sinabayan pa ng Guhit ng Lalaki (arrow b.) at tuluyang naging isang guhit na lang ang Fate Line at Guhit ng Lalaki (arrow c.) na dumiretso pa sa Bundok ng Tagumpay o Bundok ng Saturno (arrow d.), sa kaliwa at kanan mong palad.
Tulad ng nasabi na, ito ay malinaw na tanda na kahit na hindi masyadong seryoso ang sinasabi mong manliligaw, at kahit na hindi ka niya ligawan ng seryoso o magbago ang isip niya, sa isang ganito ring sitwasyon sa ibang pagkakataon, tunay ngang kagaya ng ibang mga babae na madalas magreklamong bakit daw sila lapitin ng mga lalaking may asawa na. Sa parte mo naman, kagaya ng naipaliwanag na, magiging lapitin ka naman ng mga lalaking mayaman hanggang sa isang pagkakataon, sa hindi mo sinasadya at halos hindi mo na rin inaasahan, isang lalaking mayaman ang magiging boyfriend mo at tuluyan mo na ring mapapangasawa at makakasama habambuhay.
DAPAT GAWIN
Ayon sa iyong mga datos, Karen, seryosohin ka man o hindi ng kasalukuyan mong manliligaw, wala kang dapat panghinayangan, lalo na kung sakaling mawala siya sa iyo. Sapagkat tulad ng naipaliwanag na, kahit sinong lalaki, kahit seryoso o hindi seryoso, tiyak ang magaganap - matutupad ang nakatakda at ito ay mangyayari at tuluyang magaganap sa taong 2027, sa edad mong 28 pataas, makakapag-asawa ka na ng mayamang lalaki, at siya rin ang magiging dahilan ng iyong pagyaman (Drawing A. at B. H-H arrow e.).
Comments