ni Ryan Sison @Boses | Jan. 6, 2025
Dahil sa nalalapit na ang Pista ng Poong Hesus Nazareno sa January 9, tuluy-tuloy ang preparasyong ginagawa ng marami para sa nasabing selebrasyon.
Ayon sa mga opisyal ng Quiapo Church, kumpleto at handang-handa na ang gaganaping ‘Pahalik’ ng Itim na Nazareno sa Quirino Grandstand, Rizal Park sa Maynila sa January 7.
Sinabi rin ng mga organizer na sisimulan ang ‘Pahalik’ ng Martes at susundan ito ng 30 misa ng alas-3 ng hapon ng January 8 hanggang alas-11 ng gabi ng January 9, ang mismong araw ng kapistahan.
Pangungunahan naman ni Manila Archbishop Cardinal Jose Advincula ang tradisyonal na “Misa Mayor” sa hatinggabi ng January 9.
Ang “Pahalik” ay literal na ibig sabihin na paghalik, subalit may mga deboto rin na hinahawakan o pinupunasan lamang ang kanilang mga panyo at ibang piraso ng tela, sa imahe ni Hesus Nazareno.
Nagpaalala rin si Nazareno 2025 at Quiapo Church spokesperson Fr. Robert Arellano sa mga deboto na huwag subuking akyatan ang andas habang sumunod na lang sa mga patakaran na ipapatupad para sa pagsasagawa ng Traslacion.
Nauna rito, ipinahayag ni Fr. Sinabi ni Rufino Sescon na ang Pista ng Itim na Nazareno ay isa na ngayong pagdiriwang sa buong bansa kasunod ng deklarasyon nito bilang national liturgical feast ng 2024.
Ilalabas naman ang 400 taong gulang na imahe ng Hesus Nazareno sa mismong araw ng ‘pahalik’ para bigyang-daan ang misa ngayong Lunes sa naturang simbahan.
Mabuti naman at ready na ang lahat bago pa man ipagdiwang ang Pista ng Itim na Nazareno.
Siguradong milyun-milyong deboto ang dadagsa sa naturang okasyon kaya tama lang na paghandaan talaga ito nang husto.
Dapat na tiyakin ng kinauukulan na magiging maayos ang lahat, payapa, at walang masyadong problema para sa mga dadalo, lalo na sa Traslacion.
Paalala lang sa mga kababayan na pairalin ang pagiging mahinahon, magpakita ng pagmamalasakit, matutong magpasensya nang sa gayon ay makabuluhang maidaos natin ang Pista ng Poong Itim na Nazareno.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
Comments