ni Maestro Honorio Ong - @Forecast | January 15, 2022
Ipagpatuloy natin ang pagtalakay sa katangian at kapalaran ng animal sign na Water Tiger sa taong ito ng 2022.
Kung ikaw ay isinilang sa taong 1938, 1950, 1962, 1974, 1986, 1998, 2010 at 2022, ikaw ay mapabibilang sa animal sign na Tiger.
Ang isa sa mga positibong katangian ng isang Tigre ay ang pagiging masigasig sa anumang layunin o balak niya sa buhay at sa simula ng proyekto ay tunay na masiglang-masigla siya.
Ngunit ‘pag tumagal na, umiiral ang pagiging mainipin ng Tigre, kaya minsan, ang mga nasimulan niyang gawain ay kanyang binibinbin at hindi agad natatapos.
Gayunman, kung matututunan ng Tigre na iprayoridad ang mga sinimulan niyang gawain bago gumawa o humawak ng panibagong gawain, mabubuo ang napakaunlad at matagumpay na Tigre.
Sinasabi ring sa mga pamamaraan, tunay namang kakaiba at unconventional ang diskarte ng isang Tigre, kaya sa mga bagay na kakaiba at pambihira, hinahangaan at sumisikat ang kanyang mga proyekto at gawa. Kung ipagpapatuloy lamang niya ang pambihirang katangian na ito at iisipin kung paano siya kikita ng malaking halaga sa mga gawaing ito, dahil iba siya sa lahat, hindi lang pagsikat at pagkilala ng lipunan ang kanyang aanihin. Patuloy siyang magtatamo ng malalaki, kakaiba at magagandang kapalaran, na maghahatid sa kanya ng malaking pagyaman na mapakikinabangan niya hanggang sa pagtanda.
Bukod sa pagiging kakaiba, marami ring hakbang, panukala at pagkilos ang isang Tigre na unpredictable. Kaya matapos ang isang kakaibang pakikihamok, napakaraming humahanga at namamangha sa pambihirang kakayahan na ipinakita ng isang Tigre, kung saan noong una ay iniisip ng mga taong nakapaligid sa kanya na hindi niya ito magagawa. Ngunit dahil kakaiba at mahilig mag-eksperimento, may mga pagkilos at diskarte ang Tigre na kadalasang sumasablay at pumapalpak. Ngunit sa mga loopholes at pitfalls naman na ito siya higit na hinahangaan, at sa sandaling napagtagumpayan at nagapi ng isang Tigre ang lahat ng mga pagsubok at kapalpakang ito, malaking suwerte at dambuhalang tagumpay naman ang ipagkakaloob sa kanya ng langit, higit lalo sa buong taong ito ng 2022.
Samantala, likas din sa Tigre ang pagiging makatao at maawain, lalo na sa mga mahirap.
Dahil mababa ang loob ng Tigre sa mga kapus-palad, madalas siyang naloloko ng mga taong nagpapanggap na may mabigat na pangangailangan, ngunit ang totoong hangad o motibo ay dayain o paglalangan lamang ang kanyang kapwa. Kaya naman kung hindi mag-iingat ang Tigre sa mga racketeers at sa mga gumagawa ng scam, malamang na sa taong 2022, malaking halaga ng salapi ang maaaring madaya sa kanya.
Bagama’t malihim, kapag nakapalagayan ka ng loob ng isang Tigre at “at ease” siya sa inyong pagkakaibigan, kung gaano siya kalihim sa ibang mga kaibigan niya, sa iyo naman ay tiyak na ikukuwento niya ang lahat at walang ililihim sa kanyang buhay.
Gustong-gusto kasi ng Tigre na maihayag ang kanyang mga kakaibang ideya, karanasan at saloobin sa mga taong umuunawa sa kanyang kalagayan, at kasabay na iniingatan ang kanyang pribadong buhay.
Sa mga ganitong uri ng tao labis na napapamahal ang Tigre nang hindi niya sinasadya, dahil nararamdaman niya unconsciously na nakakatagpo siya ng tao na poprotekta, uunawa, magtatanggol at magmamahal sa kanya habambuhay.
Itutuloy
Commenti