ni Atty. Persida Rueda-Acosta @Magtanong Kay Attorney | July 1, 2024
Dear Chief Acosta,
Dati akong kahera sa isang kumpanya. Pinagbintangan ako ng amo ko na kasabwat ng mga magnanakaw na kumuha ng laman ng kaha nang mangyari ang isang pagnanakaw. Kalaunan ay tinanggal nila ako sa trabaho at kinasuhan ng Qualified Theft. Sa kabutihang palad, napawalang-saysay ang nasabing kasong kriminal sa tanggapan ng piskal dahil sa kawalan ng sapat na ebidensya na ako ay sangkot sa nangyari. Maaari ba itong ituring na malisyosong pag-uusig? -- Meredith
Dear Meredith,
May mga pagkakataon kung saan maaaring panagutin sa angkop na danyos ang isang indibidwal dahil sa kapritsosong pagsasampa ng kaso, tulad kung walang sapat na ebidensya para suportahan ang kanyang mga alegasyon at kung ang kanyang paninisi ay nakaayon sa sariling paniniwala lamang at bunga ng personal na galit.
Mayroon na ring napagdesisyunang kaso ang Korte Suprema na kahalintulad sa iyong suliranin. Sa kasong Sosmeña vs. Bonafe, et al., G.R. No. 232677, June 08, 2020, sa pamamagitan ni Kagalang-galang na Kasamang Mahistrado Amy C. Lazaro-Javier, isinaad ng Korte Suprema ang mga elemento ng malisyosong pag-uusig na:
“This Court has drawn the four elements that must be shown to concur to recover damages for malicious prosecution. Therefore, for a malicious prosecution suit to prosper, the plaintiff must prove the following: (1) the prosecution did occur, and the defendant was himself the prosecutor or that he instigated its commencement; (2) the criminal action finally ended with an acquittal; (3) in bringing the action, the prosecutor acted without probable cause; and (4) the prosecution was impelled by legal malice -- an improper or a sinister motive. The gravamen of malicious prosecution is not the filing of a complaint based on the wrong provision of law, but the deliberate initiation of an action with the knowledge that the charges were false and groundless.”
Ang karapatang maghain ng kasong kriminal ay kinakailangang walang bahid ng masamang intensyon. Upang maituring na malisyosong pag-uusig, kinakailangang mapatunayan ang mga sumusunod na elemento:
may pag-uusig na nangyari, at ang nasasakdal ang nag-udyok sa pagsasampa nito;
ang isinampang kaso ay natapos sa isang pagpapawalang-sala;
ang nag-udyok sa pagsasampa ng kaso ay kumilos nang walang posibleng dahilan (probable cause); at
ang pag-uusig ay may maling layunin o hindi masamang motibo.
Kaya naman sa iyong sitwasyon, ang isinampang kaso laban sa iyo na kalaunan ay napawalang-saysay ay hindi agad nangangahulugan na may naganap na malisyosong pag-uusig. Kinakailangan mong mapatunayan na ang dati mong amo ay nag-usig nang walang posibleng dahilan at may maling layunin o masamang motibo. Sa puntong ito, maaari mong silipin ang desisyon ng korte sa iyong kasong Qualified Theft kung mayroon bang binanggit ukol sa motibo o layunin ng nagreklamo sa pagsasampa niya ng demanda laban sa iyo. Kung mapapatunayan mo ang mga nabanggit na elemento ng krimeng malisyosong pag-uusig, maaari kang maghabol ng danyos sa nagsampa ng reklamo laban sa iyo para sa abala at pinsalang idinulot niya sa iyo.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.