ni Vinia Vivar - @Frankly Speaking | May 2, 2022
Sumabak na rin sa pulitika ang basketball superstar at dating Regal baby na si Alvin Patrimonio. Tumatakbo siyang mayor ng Cainta, Rizal ngayong May 9, 2022 elections. Ayon kay Alvin, matagal niyang pinag-isipan ang alok sa kanya na tumakbong mayor ng Cainta. Noon pa raw ay marami na talagang nag-o-offer sa kanya na pasukin ang pulitika pero tinatanggihan daw niya.
“Kahit noong naglalaro pa lang ako, nag-i-invite na sila sa akin na tumakbo. Sabi ko, ‘Hindi pa po time,’” pahayag ni Alvin sa presscon nila ng ka-tandem niyang si Mon Ilagan (who’s running for vice-mayor) last Friday.
Sa palagay daw niya ay ngayon na ang tamang pagkakataon para makapagsilbi sa kanyang mga kababayan sa Cainta, Rizal.
“Nabuo ko at natamasa ko na ang success sa basketball. Ngayon naman, gusto kong magkaroon ng significance ‘yung success na ‘yun kaya nag-decide ako to run for public office. Bago ako mamatay, gusto ko, marami akong matulungang kababayan ko,” he said.
Habang sinasabi ni Alvin na gusto niyang makatulong ay nangingilid ang luha niya.
Emosyonal din siya habang inilalatag niya ang mga problema sa Cainta at ang kanyang mga plano tulad ng pabahay para sa mga less-fortunate residents na isa raw sa kanyang pagtutuunan talaga ng pansin, gayundin ang matagal na nilang problema sa baha.
At dahil nga sa galing siya sa basketball, isa rin sa kanyang misyon ay palawakin ang sports sa kanilang lugar.
Kumpiyansa rin ang dating mayor ng Cainta na si Mon Ilagan na mabibigyan ni Alvin ng bagong mukha ang kanilang bayan. Kilala raw niya ito bilang napakabait na tao kaya nakipagsanib-puwersa siya’t ibinigay ang kanyang buong suporta sa first-timer na kandidato.
On the lighter side ay may nagbanggit kay Alvin ng pangalan ng ex-girlfriend niyang si Kris Aquino.
Napangiti na lang si Alvin and being a man of few words as he is, maikli niyang sagot, “Move forward na po tayo.”
Sa mga hindi nakakaalam, dati ring naging artista si Alvin. Marami siyang nagawang pelikula sa Regal Films at nakasama rin niya sa isang movie si Kris, ang Tasya Fantasya.
Alvin is happily married to wife, Cindy, na kasama rin niyang dumalo sa presscon with two of their 4 children na sina Angelo at Tin.
Comments