by Info @Editorial | Dec. 18 2024
Ang ilegal na droga ay salot na patuloy na kumakalat at sumisira sa buhay ng maraming tao sa ating bansa.
Patuloy pa rin itong nananalasa sa ating komunidad, pamilya, at mga kabataan.
Ang epekto ng droga sa ating lipunan ay malalim at masalimuot, kaya’t kinakailangan ng mas malaking pagkilos mula sa bawat isa upang labanan ito at maiwasan ang mas maraming buhay na masisira. Isa sa mga grabeng apektadong sektor ay ang mga kabataan. Ang kabataan ay itinuturing na pag-asa ng bayan, ngunit kung hindi matutukan, sila rin ang pinakamalaking biktima ng problema sa droga.
Marami sa kanila ang nahihirapang maghanap ng direksyon sa buhay at mas pinipili ang droga bilang isang paraan ng pagtakas sa kanilang mga problema. Hindi rin nila nakikita ang mga malupit na epekto na dulot ng kanilang pagkakalulong. Kapag hindi sila naagapan, mawawala ang kanilang mga pangarap at ang mga pagkakataon para sa kanilang pag-unlad. Masasabing ang epekto ng ilegal na droga ay banta rin sa seguridad at kaayusan ng buong bansa.
Ang mga sindikato ay patuloy na namamayagpag sa mga lugar na tila hindi kayang kontrolin ng mga otoridad. Ang mga pusher at mga lider ng drug syndicate ay hindi lamang nagiging sanhi ng pagkalat ng droga, kundi pati na rin ng mga krimen mula sa pagnanakaw, pang-aabuso hanggang sa pagpatay. Dahil dito, nagiging sagabal ang droga sa pagtamo ng kapayapaan at kaayusan sa komunidad.
Ang tanong tuloy ng karamihan, anong giyera kontra droga kaya ang epektibo?
Sa huli, ang paglaban sa ilegal na droga ay isang laban na hindi lamang tinatahak ng mga otoridad, kundi ng buong lipunan. Hindi ito magiging matagumpay kung walang kooperasyon mula sa bawat isa.
Kung sama-sama tayong magsusumikap, mayroong pag-asa na mababago ang kalagayan ng ating mga kabataan at komunidad.
Comments