ni Erlinda Rapadas @Teka Nga | Dec. 1, 2024
Photo: Neri Naig Miranda - IG
Ang labis na inggit ng kanyang mga kalaban sa negosyo ang dahilan daw kaya nagkaproblema at kinasuhan ngayon ang misis ni Chito Miranda na si Neri Naig.
Ang bilis-bilis kasi ng kanyang pagyaman dahil sa mga negosyong itinayo nila ni Chito.
Well, napakasipag at madiskarte si Neri pagdating sa negosyo, kaya kumita siya nang milyones at nakapagpatayo ng mga resto, malaking bahay, resort, at nakabili ng yate na iniregalo niya sa kanyang mister.
Ngayon, bigla na lang may mga kasong isinampa kay Neri.
Naninindigan naman siya na wala siyang kinuhang pera mula sa mga sumosyo sa kanyang negosyo.
Well, kailangan ngayon ni Neri ang tulong ng isang magaling na abogado na magtatanggol sa kanya.
Maraming kaibigan ang nagdarasal na sana, malagpasan nina Neri Naig at Chito Miranda ang pagsubok na dumating sa kanilang buhay.
ANG bongga naman ng bagong proyekto ni Ian Veneracion sa ABS-CBN, ang action-drama serye na Incognito na may powerhouse cast.
Bida rito sina Daniel Padilla at Richard Gutierrez, at kasama rin sina Baron Geisler, Maris Racal, Anthony Jennings at Kaila Estrada.
Mistulang isang malaking serye ang Incognito, na ginastusan nang husto at kinunan sa iba’t ibang lugar tulad ng Palawan, Italy, at iba pa. Ito ay idinirek ni Lester Pimentel.
Well, hindi tumatanda ang hitsura ni Ian Veneracion, hindi siya nalalayo sa porma nina Daniel at Richard. Pang-leading man pa rin ang kanyang aura, dahil matikas pa rin siya at hindi lumaki ang kanyang tiyan.
Gustung-gusto ni Ian ang kanyang role sa Incognito dahil napasabak siya sa matitinding action scenes kasama sina Daniel, Richard, Baron, at Anthony. Maging sina Maris at
Kaila ay napalaban din at may mga action scenes na ginawa.
MARAMI pa rin ang kinikilig sa love team nina Cassy Legaspi at Darren Espanto, sobrang bagay daw sila sa isa’t isa.
Kaya naman nang magkita silang muli sa birthday party ni Rhea Tan, ang CEO ng Beautéderm, Inc., marami ang nag-abang sa mga magiging kaganapan kina Cassy at Darren.
Masaya ang kanilang mga fans nang makita na nagbatian at nag-usap sila. Naging komportable silang magkasama at hindi nag-isnaban.
Kaya nagbabakasakali ang mga fans na baka puwede pa raw manumbalik ang dati nilang relasyon, tutal ay pareho naman silang single.
Wala pang ipinakikilala si Cassy na boyfriend, ganoon din si Darren na wala pang girlfriend.
Pero sa ngayon, hindi priority nina Cassy at Darren ang kanilang love life. Pareho silang focused sa kanilang career. Darating din sa tamang panahon ang hinahanap nilang “the one”.
Comments