Nag-away 25 yrs. ago… ANNABELLE, PINURI NI CRISTY BILANG INA, LUMAMBOT NA, NAKIPAGBATI

ni Vinia Vivar @Frankly Speaking | December 14, 2023

Photo : Niceprintphoto

Abut-abot ang papuri ni Annabelle Rama sa batikang manunulat na si Cristy Fermin sa ginawang pagtatanggol sa kanya laban sa mga intrigang lumalabas lately.

As we all know ay naba-bash si Tita Annabelle lately at siya ang isa sa mga itinuturong dahilan ng paghihiwalay ng kanyang anak na si Richard Gutierrez at misis na si Sarah Lahbati.

Sa latest post ng Gutierrez matriarch sa Facebook ay sinabi niyang labis siyang na-touch sa ginawa ni Nanay Cristy.

Post ni Tita A (published as is), “Mabait talaga sa akin ang Sto. Nino. Sa mga nangyari sa amin na intriga ngayon pinili kong manahimik na lang at pina ubaya ko na lang kay Sto. Nino ang lahat.

“Pag gising ko kaninang umaga maraming text ako natanggap at mga missed calls from my friends na tunay na nakaka kilala at nag mamahal sa akin.

"At sabi nila ay may maganda daw silang nabasa sa facebook na sinulat ng number one kong kalaban at pinagtatanggol ako this time. Di ako naniwala at baka kako fake news na naman at ginamit lang ang pangalan niya,” kuwento ni Tita Annabelle.

“Nang kumakain na kami, sinabi ng anak ko, na maganda raw ang sinulat ng nasabing reporter at ipinagtanggol ako, kako baka fake, kaya pina check ko sa PR ng Gutierrez family at na confirmed nga niya na legit iyon account at siya nga mismo ang sumulat,” patuloy niya.

Ikinuwento rin niya ang naging journey nila ng tinutukoy niyang manunulat na aniya ay dati niyang kaaway na humantong pa sa demandahan.

“Siguro mga 25years ago, nag katapat na kami nyan, dahil naman sa pag tatanggol ko kay Ruffa. Grabe away namin noon, nag ka demandahan pa kami hanggang sa supreme court. After that incident, iniwasan ko na sya dahil ayaw ko na sya makita.

“Last year, tine text ko sya ng ilang beses kasi ang mag asawa naman ni Manny at Jinky Pacquiao ang kanyang inaaway at di maganda ang mga sinasabi niya. Pinagtatanggol ko naman ang mag asawa. Di nya ako sinagot sa mga text ko, kaya di ko na siya kinulit,” tsika ng nanay ni Ruffa Gutierrez.

Pero ngayon daw ay lumambot na ang puso niya dahil ipinagtanggol siya nito.

“This time lumambot ang puso ko sa kanya, dahil nanay rin siya at may mga anak rin at alam nya na tama ang ginagawa ko sa pag kampi ko sa anak ko, kaya nya ako naintindihan,” aniya.

Kasunod nito ay nag-sorry siya sa manunulat na hindi pa niya binabanggit ang pangalan.

“I am sorry kung ano mang di magandang mga text na nasabi ko sa iyo. At tinawagan ko sya at nag kausap kami at nag pasalamat ako. At sabi pa nga nya regards kay tito Eddie.

“Tamang tama na magkatabi kami ni Eddie sa upuan, at ipinasa ko kay Eddie ang telepono at nag usap sila. Nang mag ba-bye sya kay Eddie, sabi nya Tito Eddie, mag pa galing ka, inagaw ko ang telepono at sabi ko , malakas na malakas ang asawa ko.

“Baka nabasa mo sa facebook na nag kasakit siya dahil sa issue nina Richard at Sarah. That’s all fake news, he is very healthy, alive and kicking , he is enjoying the company of his grandchildren,” kuwento ni Tita A. 

Sa dulo, she said, “Ang tinutukoy ko ay ang isang Cristy Fermin. Cristy, salamat sa maganda mong sinulat sa akin. Merry Christmas and Peace Be With You.”

Bongga, ‘di ba naman?