ni Eli San Miguel @Overseas News | Oct. 12, 2024
Sinuspinde na ang laboratoryong responsable sa mga pagsusuri sa mga organ donation matapos mailipat ang mga organs mula sa dalawang donor. Photo: FP / File
Anim na pasyente sa Brazil ang nagpositibo sa Human Immunodeficiency Virus (HIV) matapos makatanggap ng mga infected organs mula sa organ donation service ng Rio de Janeiro, ayon sa mga opisyal nitong Biyernes.
Ayon sa opisina ng Rio Health Secretary, sinuspinde na ang laboratoryong responsable sa mga pagsusuri sa mga organ donation matapos mailipat ang mga organs mula sa dalawang donor patungo sa anim na pasyente.
Sinusuri naman ang iba pang mga transplant patient para sa posibleng impeksyon, at lahat ng nakaimbak na organs mula noong Disyembre 2023, nang magsimulang magtrabaho ang laboratoryo, ay isinailalim sa pagsusuri.
"This has no precedent," pahayag ng opisina. Iniimbestigahan ng pulisya kung saan nagmula ang dalawang maling organ tests. Nalaman ang isyu nang mag-ulat ng problema sa kalusugan ang isang heart transplant recipient at nagpositibo sa HIV.
Dalawa pang kidney transplant recipients ang nagpositibo, ayon sa mga awtoridad sa kalusugan. Nababahala naman ang mga doktor na maaaring mabawasan ang tiwala ng publiko sa organ service at bumaba ang bilang ng mga donor dahil sa pagkakamaling ito.
Comments