ni Ambet Nabus @Let's See | Mar. 22, 2025
Photo: Mariz Umali at Ramon Tulfo - IG, FB
"Bastos talaga ang bibig niyan. Pare-pareho silang magkakapatid na puro tapang at angas ang ipinagmamalaki," komento naman ng netizen sa tila maaanghang na salita na ibinato ni Mon Tulfo laban kay GMA-7 news reporter Mariz Umali.
Kaugnay pa nga rin ito ng isyung pagtawag umano ng matanda ni Mariz kay Atty. Salvador Medialdea habang nakahiga ito sa isang stretcher bago dalhin sa isang ospital sa The Hague, Netherlands.
Ipinaliwanag na ni Mariz na na-misheard lang siya dahil may kinalaman sa pagbukas at pagpikit ng "mata" ng abogado ang kanyang sinabi at hindi kailanman ang salitang "matanda."
Grabe ang reaksiyon ng mga netizens sa pagtatanggol sa pagkababae at pagkatao ni Mariz na tinukoy pa ng pinaka-panganay among the Tulfo brothers na tatanda at mangungulubot din daw.
"Naku, kung kami kay Mariz, idedemanda namin ang magaspang na bibig ng tao na ‘yan. Ni hindi inaalam ang totoong kuwento bago mambastos ng kapwa, babae pa naman," hirit pa ng netizen.
Wala pa kaming nakuhang sagot sa hinihingi naming reaksiyon ni Sen. Lito Lapid sa isyung "ni-reject" o may "veto" order si PBBM sa panukalang batas na gawing culinary capital ng bansa ang Pampanga.
Naaalala namin sa nakalipas na pakikipag-usap namin sa mag-amang Sen. Lito at Mark Lapid na tuwang-tuwa sila sa pagbabalita na sa ikatlo at final reading sa Senado last December ay inaprubahan na ang Senate Bill 2797.
‘Yun nga ang batas na naglalagay sa Pampanga bilang culinary capital of the Phils. at dahil nasa Tourism Department na lang din si Mark, may kautusan na ritong isama sa lahat ng regional and national promotion programs ang naturang Senate bill.
Abalang-abala sina Sen. Lapid at mga kaalyado sa paglilibot sa buong bansa upang mangampanya at sa maraming pagkakataon nga ay naikukuwento nito ang mga panukalang batas na kanyang naiakda o nagawa.
Lagi pa ring kasama sa Top 12 sa iba't ibang surveys para sa mga senatoriables si Sen Lapid.
Si Coco Martin at mga kasama nila sa Batang Quiapo ay nangakong magpu-full blast ng support kay Supremo pagdating ng grand rally very soon!
BONGGA naman ang naging denim and diamond-themed party ng GMA-7 kaugnay ng kanilang 75th anniversary at pasasalamat sa kanilang mga advertisers.
Ginanap ito last Wednesday (March 19) sa Makati Shangri-la Hotel kung saan present ang mga big bosses and top celebrities ng Kapuso Network.
Mula kay GMA Network Chairman Atty. Felipe L. Gozon and President and CEO Gilberto R. Duavit, Jr., present din ang mga top executives gaya nina Executive Vice-President and CFO Felipe S. Yalong, Chief Marketing Officer Lizelle Maralag, Senior Vice-President Atty. Annette Gozon Valdes, Senior Vice-President for Integrated News and Head of Synergy and Regional TV Oliver Victor Amoroso, Senior Vice-President, Corporate Strategic Planning and Business Development and Concurrent Chief Risk Officer and Head of Program Support Regie Bautista.
Rampa naman kung rampa sa kanilang naggagandahan at seksing mga denim outfits at diamonds ang mga Kapuso stars gaya nina Jessica Soho, Dingdong Dantes, Jillian Ward, Michael V., Ai Ai delas Alas, Rhian Ramos, Max Collins, Camille Prats, Julie Anne San Jose, Rayver Cruz, Gabbi Garcia-Khalil Ramos, Ysabel Ortega-Miguel Tanfelix, Bianca Umali-Ruru Madrid, Jennylyn Mercado-Dennis Trillo, Barbie Forteza at Alden Richards, ang P-pop group na Cloud at marami pang iba.
Hinahanap sa okasyon si Marian Rivera dahil solo raw na rumampa si Papa Dingdong.
Marami rin ang naghanap kay David Licauco na ang balita namin ay mayroong kasabay na commitment though humabol daw ito at diumano'y sumundo rin kay Barbie Forteza pauwi?
Wala namang untoward incident na naganap unlike sa mga previous parties na may iskandalo o intrigang nagaganap.
Comments