ni Julie Bonifacio @Winner | Jan. 30, 2025
Photo: Gladys Reyes at Christopher Roxas - Instagram
Hoping pa rin si Gladys Reyes na makasama sa isang proyekto ang mga kaibigan niyang sina Claudine Barretto at Angelu de Leon. Iyan ang isa sa mga rebelasyon ni Gladys sa ginanap na pa-get-together nila ng mister niyang si Christopher Roxas for the entertainment media sa That’s Diner last Tuesday.
Una naming narinig kay Gladys ang pangarap niya na makasama sina Claudine at Angelu sa double celebration ng wedding anniversary nila ni Christopher, at the same time, launch as a singer at birthday ng panganay nila na si Christophe Sommereux last year.
Parehong dumating sina Claudine and Angelu sa party last year. Pero nagkaroon ng intriga when Claudine said something about Angelu. After that, wala nang narinig na balita kung nagkaayos sila.
“Hindi pa nagma-materialize,” pahayag ni Gladys.
Aniya, “Pero alam mo in God’s perfect timing I believe, naniniwala ako talaga na maisasakatuparan ‘yan. Basta right time. S’yempre, schedule ng bawat isa. Importante na magharap-harap and ano, ‘di ba? Maging okay ang bawat isa.”
Maging si Gladys ay wala ring alam kung okay sina Claudine at Angelu.
“Hindi ko alam kasi ‘di ko naman sila tinatanong about that. Pero actually ang nilalambing ko sa kanila, ‘Puwede ba kayo mag-guest sa vlog ko, together?’
“Sagot nila? Hindi, kasi ‘yung isa, busy pa sa kanyang political career. Tapos ‘yung isa naman nating kaibigan din s’yempre, uh, meron ding isang ibang pinagkakabisihan ngayon.
“Pero alam mo, feeling ko lang, ha, ganu’n ako kalakas sa kanila na hindi nila ako matatanggihan. Feeling ko lang,” sabi ni Gladys.
Punong-abala siyempre pa si Gladys mula sa paghahanda ng mga malalaking pa-loot bags hanggang sa mga pagkain sa That’s Diner na inihain nila ni Christopher
para sa mga friends nila from the entertainment media.
Ipinatikim sa amin ni Gladys ang specialty sa That’s Diner nila ni Christopher, iba’t ibang luto ng bulalo gaya ng Classic Bulalo Supreme at Bulalo Kare-Kare. Bukod sa dalawang ‘yan, may Bulalo Sizzling, Bulalo Pares at Bulalo Kansi.
Ayon kay Gladys, “Itong mga bulalong ito sa That’s Diner, inire-represent nito ang pagsasama naming mag-asawa na very versatile. Minsan sizzling, minsan maasim din, ‘di ba? Pero mas marami ‘yung katamtaman ‘yung timpla.”
When asked kung ano’ng klaseng pagkain ang kanyang mister na si Christophe, sinabi ni Gladys na para itong Bulalong Sizzling.
“Kasi si Christopher, though medyo hindi na s’ya masyadong kumakain ng beef, pero ‘yun, meat eater si Christopher. Actually, ma-steak din s’ya. Pero ‘yung pagkain po dito na sinasabi n’yo po dito sa That’s Diner, ‘yun po,” ngiti ni Gladys.
Kuwento pa ni Gladys, “Isa sa specialty n’ya (Christopher) rito, ‘yung favorite ni Vice (Ganda) nu’ng nagpunta s’ya rito ay ‘yung dinakdakan. Ano ‘yan, favorite Ilocano dish, pero natuwa ako dahil pasado kay Vice. Sabi ni Vice, ‘Ang sarap ng dinakdakan n’yo. Hindi ako nainsulto bilang Ilokano.’ Pero s’ya, I’m glad na pasado sa kanya to think ang dami na n’ya siyempreng natikman na pagkain sa buong mundo.”
Well, katatapos lang ng celebration nila ni Christopher para sa kanilang 21st wedding anniversary at 32 years of togetherness last Jan. 23.
Ang dami na ng pinagdaanan nila ni Christopher at na-reach na raw nila ang level ng maturity ng kanilang relasyon.
“Ngayon, ‘yung maliit na bagay, ‘di na pinag-aawayan pa. Hindi na, pareho kaming nagkaroon ng adjustments. Nagkaroon ng maturity pagdating sa relasyon. At we choose our battles. ‘Yung puwedeng pagtalunan at pag-awayan, sige. Pero kung puwede namang palampasin, tama na, ‘di ba? Kasi hindi naman makakatulong. Tsaka sabi n’ya, at the end of the day, kung hindi naman ito ipagkakahiwalay, kasi napakaliit na bagay lang, sayang ang oras para pagtalunan at pag-awayan,” paliwanag ni Gladys.
Inamin ni Gladys na nagkaroon sila ng malaking pagtatalo ni Christopher nu’ng naging busy siya sa MTRCB at paggawa ng pelikula at teleserye. Maaaring natuluyan daw silang maghiwalay kung nagpabaya sila sa kanilang priority in life, which is their family.
Depensa ni Gladys, “Hindi nagloko si Christopher. Awa naman po ng Diyos, si Christopher, ‘yung disiplina n’ya pagdating doon, ‘di ba, na to stay faithful not just to me but to our family. Napakalakas ng self-control ng asawa ko. Sa totoo lang, sabi n’ya, hindi madali. Mahirap ‘yun.
“May mga temptation na, ang asawa ko, ‘di ba, ang guwapo? At the same time, matalino rin. At saka ano, tapos family man. Makikita mo talaga ang pagmamahal n’ya sa pamilya. Minsan ang lakas maka-attract noon, eh, sa ibang babae.
“Pero ang ipinagpapasalamat ko sa Diyos, ‘yung asawa ko ay… siguro ano rin ng Ama, ‘no, na hindi s’ya, ano ‘yung ginagawa n’ya para ‘di s’ya matukso. Kaya kailangan ang tulong ng asawa, ng babae doon sa part na ‘yun, para hindi ka matukso, para hindi ka ma-tempt, ‘ika nga. Kaya kung… not just ‘yung physical needs, kung anuman ‘yung pangangailangang emosyonal, uh, even mentally, ‘di ba?”
Turning 48 na si Gladys at wala na raw siyang plano na madagdagan pa ang mga anak nila ni Christopher.
“Ay, ano ba?! Magpo-48 na ako, ‘no? Hindi na. Pero may iba akong baby. Kasi may bago na akong vlog,” masayang balita ni Gladys.
Paliwanag niya, “Oo, late bloomer ako (sa pagba-vlog), alam ko. Kasi po dati, ang tagal na, last-last year pa ata ‘yan, ‘di ko matuluy-tuloy. Kasi nga po unang-unang gumawa ako ng movie, may MMFF kami. May ginagawa akong Netflix film (not just one but two). Gusto ko kasi, when I do something, hands-on ako.”
Pinamagatan ni Gladys ang kanyang YouTube (YT) channel na Glad To Be With You (GTBWY) na hango sa isang children song.
May mga naka-upload na sa YouTube channel niya na GTBWY na mga interviews with her celebrity friends like the Diamond Star Maricel Soriano, Eugene Domingo, Carmi Martin atbp..
Hopefully, matupad ang dream ni Gladys na makasama niya sa kanyang GTBWY YT channel sina Angelu de Leon at Claudine Barretto.