ni Erlinda Rapadas @Teka Nga | Jan. 14, 2025
Photo: Mark Herras - Instagram
Para sa amin, hindi isyu at hindi big deal ang ginawang pagpe-perform ni Mark Herras sa isang gay bar. Trabaho lang iyon, at hindi naman dapat na ikahiya lalo na’t kailangan ni Mark na kumayod dahil buntis na naman ang kanyang karelasyong si Nicole Donesa sa pangalawa nilang anak.
May pamilyang dapat buhayin at itaguyod si Mark kaya kung may mga shows na iniaalok sa kanya na puwedeng pagkakitaan, kanyang tinatanggap lalo’t wala siyang regular show sa GMA-7 ngayon.
In a way, nag-mature na rin ang dating “Bad Boy ng Dance Floor”. Feel na feel na niya ang pagiging padre de pamilya. Responsable na siya at hindi na happy-go-lucky guy.
Alam na ni Mark ang kanyang mga prayoridad sa buhay. Natuto na siya sa mga pagkakamaling nagawa.
Kaya hindi dapat kutyain at pagtawanan ng mga netizens ang pagpe-perform ni Mark Herras sa gay bar na mala-Magic Mike ang dating. Ang importante ay nagsisikap siyang kumita nang maayos para sa kanyang pamilya. Mas gugustuhin na ni Mark ang ganito sa halip na manghingi, mangutang at mamalimos ng tulong sa mga kapwa niya artista.
Malakas pa naman siya at kayang magbanat ng buto.
Malaking tanong para sa mga tagahanga nina Kim Chiu at Paulo Avelino kung bakit biglang naurong ang pelikulang My Love Will Make You Disappear (MLWMYD) mula sa original playdate nito sa February, gayung dapat ay Valentine offering ito ng Star Cinema.
Bakit daw biglang ipinalit ang movie nina Jolina Magdangal at Marvin Agustin, at ang KimPau movie ay sa Marso na ipapalabas?
May inilabas nang statement ang Star Cinema tungkol sa nasabing pagbabago ng playdate, pero hindi ito lubos na matanggap ng mga supporters ng KimPau love team.
Sey naman ng mga netizens, bilang producer, karapatan ng Star Cinema na magbago ng desisyon sa playdate ng kanilang pelikula.
Seniority-wise, lamang ang Jolina-Marvin tandem kumpara sa tambalang KimPau. At may solid fans and supporters pa rin hanggang ngayon sina Jolens at Marvin.
Ilang taon nang hinihintay ang pagbabalik ng tambalan nila sa big screen. For sure, panonoorin ng kanilang mga fans ang reunion movie nilang Ex Ex Lovers (EEL) na swak sa Valentine playdate. Kaya huwag nang umapela pa ang KimPau fans.
Padir na si Joey, 5 taong ‘di kinausap…
KEEMPEE, 2 TAONG TINIKIS ANG MADIR NA SI DARIA
Para kay Keempee de Leon, pinakamasaya at memorable ang kanyang 52nd birthday celebration na inorganisa ng kanyang dad na si Joey de Leon.
The best gift ito na kanyang natanggap dahil mas nagkalapit sila ng loob ng kanyang dad. Kulang ang isang araw upang sila ay mag-bonding. Sinusulit nila ang limang taon na wala silang komunikasyon.
Bukod sa kanyang Daddy Joey, dalawang taon ding hindi nakipag-ugnayan si Keempee sa kanyang mom, ang veteran actress na si Daria Ramirez.
Nagkaroon sila ng samaan ng loob, at aminado si Keempee na pinairal niya ang kanyang pride at iniwasan ang ina. Sinadya ni Keempee na putulin ang kanilang komunikasyon.
Pero dumating din sa punto na na-realize niya ang kanyang pagkakamali. Siya na ang gumawa ng paraan upang magkita sila ng kanyang mom at nag-sorry siya rito.
Ngayon, ang gaan-gaan na ng pakiramdam ni Keempee. Naayos na ang kanyang problema sa pamilya. Kasunod nito ay ang pagsiglang muli ng kanyang career.
Kasama siya sa bagong serye ng GMA-7, ang Prinsesa Ng City Jail (PCJ) na pinagbibidahan nina Sofia Pablo at Allen Ansay.
Wish ng mga fans ni Keempee ay magtuluy-tuloy na ang magagandang kaganapan sa buhay ng aktor.