ni Atty. Persida Rueda-Acosta @Magtanong Kay Attorney | July 2, 2024
Dear Chief Acosta,
Naghain ng reklamong VAWC ang anak ko laban sa kanyang dating nobyo. Sa ngayon ay lubos na mental at emosyonal na paghihirap ang kanyang hinaharap dulot ng trauma sa kanyang mga pinagdaanan. Kung kaya’t inirekomenda na sa kanya na magpatingin sa isang espesyalista upang matulungan siya, ngunit nangangamba siya na hindi siya payagan na makaliban sa kanyang trabaho. Ang sabi sa amin sa Hall of Justice ay mayroong partikular na leave benefits para sa mga biktima ng VAWC. Totoo ba iyon? Magagamit din kaya iyon sa pagpapatingin sa doktor? Sana ay malinawan ninyo ako. – Hermie
Dear Hermie,
Ang proteksyon na ipinagkakaloob ng Republic Act (R.A.) No. 9262, o mas kilala bilang “Anti-Violence Against Women and Their Children Act of 2004”, ay hindi lamang ang masiguro na maparusahan ang sinumang mapatutunayang nang-abuso, kundi ang mabigyan din ang mga biktima ng pang-aabuso o VAWC victims ng sapat na pagkakataon na harapin ang lahat ng kakailanganin kaugnay sa pagsusulong ng kanilang karapatan.
Kaugnay nito, ipinagkakaloob sa ilalim ng nasabing batas ang paid leave of absence para sa mga manggagawa na VAWC victims, maging sila man ay nasa pribado o pampublikong sektor. Partikular na nakasaad sa Section 43 ng R.A. No. 9262 ang sumusunod:
“SECTION 43. Entitled to Leave. – Victims under this Act shall be entitled to take a paid leave of absence up to ten (10) days in addition to other paid leaves under the Labor Code and Civil Service Rules and Regulations, extendible when the necessity arises as specified in the protection order.
Any employer who shall prejudice the right of the person under this section shall be penalized in accordance with the provisions of the Labor Code and Civil Service Rules and Regulations. Likewise, an employer who shall prejudice any person for assisting a co-employee who is a victim under this Act shall likewise be liable for discrimination.”
Para sa kaalaman ng lahat, ang benepisyo na ito ay maaaring gamitin o ilaan ng biktima sa pag-aasikaso ng kanyang reklamo at/o sa kanyang pagpapagamot na mayroong kaugnayan sa dinanas niyang pang-aabuso. Subalit bago magamit ang nasabing benepisyo ay kinakailangan na kumuha ang naturang biktima ng kaukulang sertipikasyon na magpapatunay na siya ay mayroong isinusulong na reklamo o kaso.
Para naman sa mga manggagawa sa pampublikong sektor, kinakailangan na sila ay mag-file ng leave application na nakasaad ang R.A. No. 9262 bilang basehan ng kanilang pagliban. Ang employer na hindi magbibigay ng angkop na leave credits sa manggagawa na biktima ng VAWC ay maaaring ireklamo at mapatawan ng parusa. Alinsunod sa Rule VI, Section 42 ng Rules and Regulations Implementing R.A. No. 9262:
“Section 42. Ten-day paid leave in addition to other leave benefits. -- At any time during the application of any protection order, investigation, prosecution and/or trial of the criminal case, a victim of VAWC who is employed shall be entitled to a paid leave of up to ten (10) days in addition to other paid leaves under the Labor Code and Civil Service Rules and Regulations and other existing laws and company policies, extendible when the necessity arises as specified in the protection order. The Punong Barangay/kagawad or prosecutor or the Clerk of Court, as the case may be, shall issue a certification at no cost to the woman that such an action is pending, and this is all that is required for the employer to comply with the 10-day paid leave. For government employees, in addition to the aforementioned certification, the employee concerned must file an application for leave citing as basis R.A. 9262. The administrative enforcement of this leave entitlement shall be considered within the jurisdiction of the Regional Director of the DOLE under Article 129 of the Labor Code of the Philippines, as amended, for employees in the private sector, and the Civil Service Commission, for government employees.
The availment of the ten day-leave shall be at the option of the woman employee, which shall cover the days that she has to attend to medical and legal concerns. Leaves not availed of are noncumulative and not convertible to cash.
The employer/agency head who denies the application for leave, and who shall prejudice the victim-survivor or any person for assisting a co-employee who is a victim-survivor under the Act shall be held liable for discrimination and violation of R.A 9262.
The provision of the Labor Code and the Civil Service Rules and Regulations shall govern the penalty to be imposed on the said employer/agency head.”
Sa sitwasyon ng iyong anak, makabubuti na siya ay kumuha ng sertipikasyon patungkol sa kasong VAWC na inihain niya laban sa kanyang dating nobyo, at ipresinta ito sa kanyang opisina upang magamit niya ang VAWC leave benefits at makapagpatingin sa espesyalista. Sa gayon ay makakuha ng angkop na pagpapagamot bunsod ng trauma na kanyang naranasan bilang isang VAWC victim. Kung siya ay kawani ng gobyerno, huwag kalimutan na kailangan niyang maghain ng kaukulang R.A. No. 9262 leave application.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.