Mga swak na negosyo para sa taong otso, alamin!

ni Maestro Honorio Ong @Kapalaran ayon sa Palad | August 12, 2023

KATANUNGAN:

1. May negosyo kaming computer rental ang problema ay unti-unti na itong nalulugi, kaya balak ko na itong isara at ibenta na lang ang aking units. Mahal kasi ang upa sa puwesto at mataas din ang bayad sa kuryente.

2. Sa ngayon pataya-taya na lang kami sa lotto at umaasa na kami ay tumama ng malaking halaga at maisalba pa ang aming negosyo.

3. Maestro, sana mabigyan n’yo rin ako ng mapalad na numero. Isinilang ako noong Enero 8, 1985.

4. May pag-asa pa kayang makabangon ang aming kabuhayan? Kung magkakaroon kami ng puhunan ano kaya ang masuwerteng negosyo para sa akin? At may chance pa kaya akong yumaman ayon sa guhit ng aking palad?

KASAGUTAN

1. Ayon sa birth date mong 8 at zodiac sign na Capricorn hindi produktong may kaugnayan sa computer ang suwerte mo, kundi mga kalakal o mga produktong solido at butil. Ang pag-aanalisang sa nasabing mga kalakal ka yayaman ay madali namang kinumpirma ng matambok at malaman na Mount of Saturn (Drawing A. at B. arrow a.) sa kaliwa at kanan mong palad. Ibig sabihin, hindi tama ang produktong computer para sa iyo, sa halip ang mas angkop ay magtayo ka ng tindahan o grocery habang ang pinakatampok mong kalakal ay bigas, mais, kape, munggo at iba pang kauri nito.

2. Sa ganyang mga kalakal ka susuwertehin, puwede rin sa iyo ang mga kalakal na delata, noodles at iba pang basic foods. Ganundin ang kalakal na nanggagaling sa ilalim ng lupa, tulad ng mga lamang ugat at pagmimina. Ang kalakal o negosyong gasoline station at iba pang uri nito ay maaari ring subukan na madali namang kinumpirma at pinatunayan ng straight Head Line (Drawing A. at B. H-H arrow b.) sa kaliwa at kanan mong palad. Ibig sabihin, sa takdang panahong inilaan ng tadhana, mabilis kang yayaman.

MGA DAPAT GAWIN

1. Samantala, bukod sa numerong may sumatotal na 4, tulad ng 13, 22, 31, 40, at iba pang uri nito, mapalad ka rin sa lahat ng numero na may sumatotal na 2, at 7, tulad ng 11, 20, 29, 7, 16, 25, 34 at iba pang uri nito. Puwede mo ring subukan ang numerong 4, 7, 16, 23, 31 at 40, gayundin ang numerong 1, 18, 25, 34, 37 at 41.

2. Significant at favorable na panahon naman sa iyo ang buwan ng Abril hanggang Mayo, Agosto hanggang Setyembre at Nobyembre, higit lalo sa mga petsang 5, 14, 23, 4, 13, 22, 31, 7, 16 25, 1, 10, 19 at 28.

3. Habang ayon sa iyong mga datos, Mercy, sundin mo lang ang mga mungkahing nabanggit sa itaas, tiyak ang magaganap, sa taong 2034 sa edad mong 49 pataas, sa pamamagitan ng suwerte at tamang negosyo, magsisimula ka ng yumaman, hindi lang simpleng yaman, kundi mayamang-mayaman (Drawing A. at B. N-N arrow c.) na siya ngang nakatakdang sa mga taong tulad mo na taong otso.