ni Maestro Honorio Ong @Forecast | Marso 25, 2024
Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.
Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Rat o Daga.
Ang Rat o Daga ay silang mga isinilang noong 1924, 1936, 1948, 1960, 1972, 1984, 1996, 2008, 2020, at 2032.
Ang kinaganda pa sa isang Daga, hindi man niya alam kung ano talaga ang kanyang gusto, alam naman niya kung papaano ito kukunin.
Kadalasan, hindi niya alam na ang langit mismo ang may panukala, basta ginusto o inambisyon niya ang isang bagay, sa bandang huli, mapapasakamay niya rin ito.
Tulad ng nasabi na, maaaring ang langit na mismo ang kusang magbigay ng katuparan sa kanyang mga ambisyon. Kaya naman ang isang Daga ay nakakaranas ng isang maalwan, masarap at maginhawang pamumuhay, lalo na sa panahong siya ay nagkaka-edad.
Sinasabi ring bukod sa pagiging praktikal, madali rin nilang nakukuha ang kanilang gusto, at may likas ding siyang kakayanan na pagtrabahuhin ang iba pang mga kasama niya na tatamad-tamad. Dahil dito, bagay na bagay sa isang Daga ang propesyong nag-uutos, tulad ng manager o supervisor ng isang malaking kumpanya.
Sa pakikipag-ugnayan, sinasabi ring kung nakapasok sa isang intriga at iba’t ibang problema na may kaugnayan sa siraan at sipsipan sa opisina o sa kumpanya, ang daga ay hindi basta-basta naaapektuhan ng mga intrigang ito.
Nangyaring ganu’n, dahil para sa isang Daga, pumapasok agad sa isip niya ang katagang, “Bahala kayo sa buhay n’yo, basta ako ginagawa ko ang aking trabaho.” Ibig sabihin, ang Daga ay hindi mapagpatol sa mga taong walang ibang ginawa, kundi pagtsismisan at siraan ang kanilang kapwa.
Ang nangyayari, dahil likas silang may mataas na IQ, lalo na sa mga bagay na may kaugnayan sa “human relationship” alam na alam niya kung paano makakaiwas sa mga siraan, sipsipan at mga sari-saring intriga. Ang kinaganda pa rito, kahit na masuot siya sa gulo at intriga, makikita mo pa rin siyang kampante, parelaks-relaks at parang hindi naaapektuhan. Dahil sa attitude niyang ito, madali niyang nalulusutan at nasosolusyunan ang mga problema. Kaya lang dahil ang Daga ay likas na may mataas na ambisyon, kung minsan ang iba’t ibang pangarap din ang nagiging dahilan upang siya ay makaranas ng matinding lungkot at kabiguan.
Ang kadalasan kasing nangyayari, nauubos na ang kanyang energy kung saan-saan, kaya imbes na maabot niya ang kanyang inaambisyon, nagpapalipat-lipat pa siya ng gusto o nagkakaroon pa siya ng bagong papangarapin, gayung hindi pa naman niya naaabot o natatapos hablutin ang nauna niyang pinangarap. Kaya para magtagumpay at mas lumigaya, ang dapat niyang gawin ay magpokus muna sa isang ambisyon at kapag nakamit na ito, saka na muli mangarap.
Sa ganyang paraan, darating ang pagkakataon, sa paisa-isang ambisyon na ito, tiyak na makakamit ng isang Daga, ang isang bonggang tagumpay.
Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.
Itutuloy….
Комментарии