Mga gamot na pa-expire na, ipamigay na! — Palasyo

ni Ronalyn Seminiano Reonico | October 6, 2020

Ipinag-utos ni Pangulong Rodrigo Duterte na ipamahagi na ng Department of Health (DOH) ang mga gamot na malapit nang ma-expire, ayon kay Presidential Spokesperson Harry Roque.

Ayon sa 2019 audit report ng Commission on Audit (COA), may nakaimbak umano ang DOH na aabot sa P2.2 billion halagang mga gamot na expired na, overstocked at malapit nang ma-expire, gayundin ang mga medical at dental supplies.

Pahayag ni Roque, “Ang mandato po ng Presidente sa DOH, lalung-lalo na iyong mag-e-expire na, paki-distribute na po nang hindi masayang at 'yung mga overstocked at slow moving naman po ay ilabas na po natin sa ating mga warehouse nang magamit ng ating mga kababayan.”

Ayon sa report ng COA, P1.14 billion ang halaga ng mga inventory items na overstocked, P1 billion naman ang halaga ng mga medical supplies na malapit nang ma-expire at P29 million ang halaga ng expired na.

Saad ng COA, “The occurrence of these expired, overstocked and nearly expired inventory items is a manifestation of an excessive expenditure since items were procured more than what is needed.

“It is a result of poor inventory/supply management system covering procurement planning, monitoring, storage and acceptance/issuance/transfer/distribution of goods.”