ni Ador V. Saluta - @Adore Me! | June 01, 2021
Hinirang na grand winner ng katatapos lamang na ikatlong season ng Your Face Sounds Familiar si Klarisse de Guzman. Second place naman si Lei Reposposa habang third placer si Vivoree Esclito.
Bukod sa tatlong big winners, kasama rin sa final showdown ang mga Kapamilya stars na kinabibilangan nina Geneva Cruz, Jhong Hilario, CJ Navato, Idolls na trio nina Lucas Garcia, Matty Juniosa at Enzo Almario, at Christian Bables.
Sa ginanap na final showdown noong Sabado, Mayo 29, pinabilib ni Klarisse ang mga hurado at mga manonood sa kanyang pag-awit ng kantang Over the Rainbow bilang si Patti Labelle para sa kanyang final performance.
Samantala, ang second placer na si Lie na dating Pinoy Big Brother housemate ay hinangaan para sa kanyang panggagaya sa OPM icon na si Dulce.
Habang si Vivoree na isa ring dating PBB housemate ay nanalo namang third placer matapos mag-ala-Ariana Grande.
Sa kabuuan, nakakuha si Klarisse ng accumulated score na 90, dahilan para maiuwi niya ang titulo bilang champion ng Your Face Sounds Familiar Season 3.
Sa kanyang panayam, aniya, "Sobrang hindi po ako makapaniwala kasi sobrang tagal ko na ring pinangarap na makahawak ng trophy as a title. Ito na po 'yun. Maraming-maraming salamat po at hindi ko po makakalimutan 'tong experience na 'to kasi parang iniba niya ako. Na-try ko 'yung mga bagay na hindi ko nagagawa dati," pahayag ni Klarisse pagkatapos magwagi.
Bilang grand winner, nag-uwi si Klarisse ng premyong P1 million in cash at house and lot mula sa Lessandra.
Comments