May 'di boto sa BF ng aktres-singer? PRAMIS NI RAYVER: JULIE ANNE, NEVER KONG IIWAN AT PATULOY NA IPAGLALABAN

ni Erlinda Rapadas @Teka Nga | Nov. 12, 2024

Photo: Rayver Cruz at Julie Anne San Jose - IG

Seryoso at madamdamin ang naging mensahe ng Kapuso actor na si Rayver Cruz para sa nobyang si Julie Anne San Jose. Nagpahayag ito ng pangako sa Limitless Star na kahit marami ang ayaw sa kanya para kay Julie Anne, hindi siya susuko at patuloy na mamahalin ang nobyang singer-actress. 

Hindi raw iiwan ni Rayver si Julie Anne at patuloy na ipaglalaban ang kanilang pagmamahalan. 

Naiintriga kami kung sinu-sino kaya ang tutol at humahadlang sa relasyon nina Julie Anne at Rayver? At ano ang dahilan para ayawan nila si Rayver para kay Julie Anne? 

Hindi naman masasabing nakikisakay lang ang aktor-dancer sa kasikatan ng GF na singer-actress. Hindi naman sila laging magkasama sa mga shows ng GMA-7. At si Rayver ay hinahasa nang husto ang kanyang acting skills at major cast siya sa isang serye.  

Sa mga out-of-town shows lang sila madalas magkasama ni Julie Anne, at sa musical-variety show na All-Out Sundays (AOS). 

Ginawa naman ni Rayver ang lahat upang patunayan na hindi siya nakadepende lang kay Julie Anne. 

Well, it’s good na hindi rin naniniwala si Julie Anne San Jose sa paninira kay Rayver Cruz.

Nanaig pa rin ang kanyang puso at tiwala sa nobyo. 

Naalala tuloy namin ang sinabi ni Mommy Divine Geronimo noong nanliligaw si Rayver kay Sarah Geronimo. Inayawan daw ni Mommy Divine ang aktor dahil mukha itong aparisyon. 

Ano kaya ang ibig sabihin ni Mommy Divine ru'n? 

---

Mismong ang Kapuso actress na si Max Collins ang nagkumpirma na officially divorced na sila ng kanyang ex-husband na si Pancho Magno! 

Maayos ang kanilang paghihiwalay at walang sumbatan at siraan na nangyari. Hindi sila nagbigay ng anumang pahayag sa media nang mabunyag sa publiko ang kanilang paghihiwalay. Pinili nina Max at Pancho na manahimik muna. 

Ganunpaman, hindi sila nakakalimot sa kanilang tungkulin sa anak nilang si Skye. May co-parenting agreement sila para sa bata.

Samantala, hati ang reaksiyon sa balitang divorced na sina Max at Pancho. May ilang natuwa dahil makakapagsimula sila ng bagong chapter sa kanilang buhay, pero may mga kaibigan at tagahanga na labis na nanghihinayang. Umaasa pa kasi sila na magkakabalikan pa ang dating mag-asawa dahil bagay na bagay daw sina Max at Pancho sa isa’t isa. 

Pero, paniniyak ni Pancho, mananatili silang magkaibigan ni Max kahit divorced na sila. Nandoon pa rin ang kanilang respeto sa isa’t isa at patuloy na gagampanan ni Pancho ang kanyang responsibilidad sa anak nilang si Skye.

---

MASAYA kaming makita na aktibo ngayon sa kanyang singing career si Ice Seguerra. Mabentang-mabenta siya sa mga shows abroad, at big hit ang kanyang mga Videoke Hits concerts. 

Na-reinvent ni Ice ang sarili bilang singer-performer. Uso pa rin siya at nakikipagsabayan sa concert scene. 

Malaking tulong si Liza Diño sa pagbabalik-sigla ng career ni Ice Seguerra. Si Liza ang “wind beneath my wings” ni Ice. Si Liza ang naging inspirasyon at patuloy na nagbibigay ng motivation upang makamit ni Ice ang mga gusto niyang abutin sa buhay. Swak ang tandem nila sa pagbuo ng Fire and Ice Productions. 

Hindi naman talaga kumupas ang singing career ni Ice Seguerra, medyo nagpahinga lang pansamantala. 

Wish ng mga loyal fans ni Ice, sana ay magkaroon siya ulit ng another hit song na tulad ng impact ng kantang Pagdating ng Panahon. 

Nabanggit ni Ice na paborito niya ang kantang Anak ni Freddie Aguilar. Posible kayang mai-record niya ito? Puwede rin siyang gumawa ng compilation of Ice Seguerra's songs.

---

SA lahat ng nakarelasyon ni John Estrada, pinakamatagal ang pinagsamahan nila ni Janice de Belen. Nagkaroon sila ng apat na anak — tatlong babae at isang lalaki. 

Ang panganay ay si Inah, sumunod si Moira, at sinundan ni Kyla. Bunso si Yuan, ang only boy sa kanilang mga anak. 

Binata pa si John ay kilalang chickboy na. Pero kahit na babaero, tinanggap ito ni Janice de Belen kaya sila nagtagal. 

Kaso, hindi nagpakamartir si Janice sa piling ni John. May hangganan ang kanyang pagtitiis, at nakipaghiwalay sa mister. 

Ganunpaman, kahit hiwalay na sila ni Janice, hindi pinutol ng aktor ang relasyon niya sa kanilang mga anak. Close pa rin silang mag-aama at nagkikita on special occasions. 

Pero si Janice, hindi na nagkaroon ng bagong karelasyon after John. Sa career na lang niya ibinuhos ang kanyang panahon. 

Si Priscilla Meirelles, hindi rin martyr type. Nagkaroon sila ni John ng isang anak, pero hindi niya rin kinaya ang pagiging babaero ng mister, kaya nagdesisyong makipaghiwalay na.

So far, no regrets naman si Janice de Belen sa naging relasyon nila ni John Estrada dahil nagkaroon siya ng mga anak, kaya kumpleto ang kanyang pagiging ganap na ina.