ni MC @Sports | February 14, 2023
Ilang sandali lang matapos umiskor ng kanyang pinaka-kahanga-hangang tagumpay, sinabi ni Filipino middleweight Eumir Marcial na posibleng hindi siya sumagupa sa 32nd Southeast Asian Games at maging ang 19th Asian Games sa Hangzhou.
Naitala ni Marcial ang 4-0 record na may dalawang knockout at sinabi ang ilan sa plano ng kanyang koponan sa professional rank upang mapabilis ang kanyang pag-akyat sa 160-lb rankings. “Ang aking susunod na laban ay pansamantalang naitakda sa Mayo at ito ay magiging isang ten-rounder,” ani Marcial matapos talunin via TKO ang kalabang si Argentine Ricardo Villalba sa ikalawang round sa Alamodome sa San Antonio, Texas.
Isang right hook sa ulo ang nagpabagsak kay Villalba at kahit nakabangon, inawat na ng referee ang laban na nagbigay kay Marcial ng kanyang unang malaking panalo sa apat na laban.
Iyon ang pangalawang beses na humalik si Villalba sa canvas nang pabagsakin siya ni Marcial sa opening round na may mabangis na kaliwa sa katawan matapos i-set up ang pamatay na suntok sa pamamagitan ng double (kanan) jab.
Sa gitna ng selebrasyon, pinalutang ni Marcial ang ideya na ang kanyang mga handler ay determinadong pabilisin ang mga bagay sa kanyang pag-akyat sa 160-lb division.
Sumusumpa si Marcial na ang oras ay napakahalaga. “Ako ay 27 na,” sabi niya.
Mula nang maging propesyonal noong Disyembre 2020 sa Los Angeles, nahirapan si Marcial na makagawa ng kumbinsidong panalo kontra sa mga kalaban. Inamin ni Marcial na mahirap at mapanghamon ang pagiging pro at amateur at the same time.
Bagama’t hindi tugma ang kanyang iskedyul sa SEA Games, sinabi ni Marcial na sisikapin pa rin niya ang kanyang makakaya para makipaglaban sa Asian Games, isang event na magsisilbing qualifying para sa 2024 Paris Olympics.
Comments