ni Green Lantern @Renda at Latigo | Pebrero 12, 2024
Napabilib ni Manila Boy ang mga karerista matapos sikwatin ang makapigil-hiningang panalo sa PHILRACOM Rating Based Handicapping System na nilarga noong Sabado ng hapon sa Metro Turf - Malvar sa Tanauan City, Batangas.
Kumaripas sa largahan ang Sinag para hawakan ang bandera habang kalmadong nagmasid sa segundo puwesto ang Manila Boy at hinete nitong si Mark Angelo Alvarez.
Pagdating sa kalagitnaan ng karera ay abante si Sinag ng tatlong kabayo kay Manila Boy habang nasa tersero puwesto si Queen Margaux.
Nakalapit sina Manila Boy at Queen Margaux kay Sinag sa unahan pagsapit ng far turn at papalapit ng huling kurbada ay nakihalo na rin sa tatlo si Happy Maggie.
Pagsungaw ng rektahan ay nagkapanabayan na ang apat sa unahan, nasa gitna si Manila Boy nasa bandang labas si Queen Margaux, katabi ng winning horse si Sinag habang sa balya dumaan si Happy Maggie.
Sa huling 100 metro ng karera sina Manila Boy at Happy Maggie na lang ang nagbabakbakan pero umiral ang tikas ng una kaya tinawid nito ang meta ng may isang kabayo ang agwat sa pangalawa.
Inirehistro ni Manila Boy ang tiyempong 1:29.6 sa 1,400 meter race sapat upang hamigin ng winning horse owner ang P11,000 added prize.
Terserong dumating sa finish line si Queen habang pumang-apat si Sinag sa event na suportado ng Philippine Racing Commission, (PHILRACOM) ni Chairman Reli de Leon.
Kinubra naman ng breeder ng winning horse ang P45,000 premyo habang tig-P1,000 at P500 ang second at third ayon sa pagkakasunod.
Samantala, inaabangan pa rin ng mga karerista ang re-schedule ng Japan Cup.
Comments