by Info @Editorial | Mar. 7, 2025
Umabot na sa 1,450 indibidwal ang nahuli sa paglabag sa election gun ban habang nasa 2,000 armas naman ang nakumpiska.
Sa kabila ito ng laging paalala ng mga otoridad na kahit may license to own at possess firearm, kahit may permit to carry firearms, kahit may firearm registration ang baril, kapag ito’y inilabas ng bahay nang walang karampatang certificate of authority o gun ban exception, labag pa rin ito sa batas.
Hindi maitatanggi na ang pagkakaroon ng baril sa bansa ay isang usapin na matagal nang pinagtatalunan, ngunit sa kasalukuyan, tila nagiging mas matindi ang epekto nito sa ating kaligtasan at seguridad.
Habang ang mga legal na may-ari ng armas ay pinapayagan ng batas, ang hindi mabilang na mga baril na nagkalat sa kamay ng mga hindi otorisadong tao ay nagiging pangunahing sanhi ng iba’t ibang uri ng krimen. Sa kasalukuyan, hindi na bago ang mga ulat ng karahasan na dulot ng mga hindi lisensyadong baril na ginagamit sa mga holdap, pananambang, at iba pang uri ng krimen.
Sa isang lipunang may madaling akses sa mga armas, ang panganib ng karahasan ay tumataas, at ang mga inosenteng mamamayan ang unang naaapektuhan.
Isa sa mga pinakamahalagang hakbang upang mabawasan ang problema ng mga nagkalat na baril ay ang pagpapalakas ng mga programa ukol sa disarmament at mas mahigpit na pagpapatupad ng mga batas hinggil sa pagmamay-ari ng armas.
Dapat na magkaroon ng mas malupit na parusa para sa mga nahuling may hawak ng ilegal na baril.
Ang mga mamamayan ay may karapatang mabuhay nang ligtas, at ang gobyerno ay may obligasyon na tiyakin ito.
Comentarios