ni Vinia Vivar - @Frankly Speaking | June 19, 2021
Bagama’t wala pa sila sa masasabing boyfriend-girlfriend relationship, aminado naman sina Ken Chan at Rita Daniela na sobrang lalim na ng kanilang relasyon bilang magka-love team at bilang magkaibigan.
Sa virtual mediacon para sa kanilang bagong serye sa GMA-7 na Ang Dalawang Ikaw na ginanap last Thursday, kitang-kita naman kung gaano sila ka-concern sa isa’t isa. Nakakatuwa nga si Rita dahil pinaalalahanan pa niya si Ken na hindi pa raw kumakain at hindi pa rin umiinom ng tubig.
Ayon nga kay Rita, sanay na sanay na raw siya kay Ken na kapag hindi niya nakikita ay sobrang nami-miss niya.
Aminado naman si Ken na mahal na mahal niya si Rita at nagbitaw ng pangakong hindi raw siya mawawala sa buhay ng aktres kahit ano ang mangyari.
“Ang maipapramis ko kay Rita, kahit ano ang mangyari, hindi ako mawawala sa buhay mo. Kahit na ano'ng tahakin mo, I’m just here, nandito lang ako,” ani Ken.
Nang tanungin kung bakit ‘yun ang pangako ni Ken, sey niya, “Iba ‘yung relationship namin kasi ni Rita. Nasabi ko na hindi ako mawawala sa buhay niya kasi mahal ko siya. Napamahal na sa akin si Rita and alam mo ‘yung sa family, mahal mo ‘yung pamilya mo, hindi mo siya kayang iwanan. Ganu’n ‘yung nararamdaman ko kay Rita.”
Nang mahingan naman ng reaksiyon ang aktres, aniya ay alam naman daw niya ‘yun dahil ipinaparamdam ito parati sa kanya ni Ken.
“Alam ko naman na ‘yun ang sasabihin niya, saka marami namang moments na ipinapa-feel niya ‘yun sa akin, na mahal niya ako. Nararamdaman ko naman ‘yun. 'Di ba, kasabihan nga, action speaks louder than words,” ani Rita.
Pero aniya, sobrang natatakot daw sila na magkaroon ng relasyon dahil baka hindi mag-workout at mawala nila ang isa’t isa.
“Kapag naging boyfriend ko si Ken Chan, I’ll lose him as my friend, as my best friend. So, kapag hindi nag-workout ang relationship namin, malu-lose ko siya, malu-lose ko ‘yung best friend ko, malu-lose ko ang boyfriend ko. So, ano'ng mas pipiliin ko?” ani Rita.
Samantala, sobrang thankful ng RitKen sa GMA-7 na lagi silang binibigyan ng magagandang projects tulad nga nitong Ang Dalawang Ikaw kung saan ay talagang sinubok na naman ang kakayahan nila sa pag-arte. At sa trailer pa lang, obviously ay naibigay nila ang hinihingi ng kani-kanilang role dahil napakahusay nila sa mga eksenang ipinakita.
Sa Ang Dalawang Ikaw ay ginagampanan ni Ken ang isang lalaking may Dissociative Identity Disorder (DID) na may dalawang katauhan na magkaibang-magkaiba ang personalidad.
Si Rita naman ay gumaganap na asawa ng isa sa dalawang karakter ni Ken na si Nelson.
Magsisimula na sa June 21 ang Ang Dalawang Ikaw sa GMA Afternoon Prime.
Comentários