ni Maestro Honorio Ong @Kapalaran Ayon Sa Numero | Oct. 21, 2024
Dear Maestro,
Palagi kaming kinakapos sa pang-araw-araw na pangangailangan. Kaya naman, naisipan ko nang kumunsulta sa inyo para sana malaman kung sa edad kong 37, may pag-asa pa ba akong makarating sa ibang bansa at makapagtrabaho kahit bilang katulong lang?
‘Yung dalawa ko kasing pinsan ay nakaalis na, at ako na lang ang natira dahil may naging problema sa papeles ko. Pero sabi ng agency namin, makakaalis din naman daw ako.
Sa ngayon ay tinutulungan ako ng tiyahin ko para sa mga papeles at panggastos.
Kausap ko rin ngayon ‘yung isa kong pinsan na nasa abroad na, at nangako rin siyang tutulungan niya ako.
Ang birthday ko ay April 13, 1987, habang October 10, 1985 ang birthday niya.
Maestro, kapag nasa abroad na ako, tunay kayang tutulungan niya ako roon?
Umaasa,
Lara ng Bagbag, Novaliches, Quezon City
Dear Lara,
Sa mga hindi inaasahang pagkakataon, ang mga kamag-anak natin ang nagiging blessing sa ating buhay, gayunman minsan sila rin ang nagpapahamak sa atin.
Ganu’n talaga ang buhay dahil kadalasan ay hindi mo naman mapipili ang kamag-anak. Kumbaga, kusa lang din silang dumarating sa ating karanasan. Ang kaibahan lamang ng kaibigan sa kamag-anak, ang kaibigan ay puwede mong iwasan, pero ang kamag-anak, kahit ano’ng iwas, mananatili siyang kadugo habambuhay.
Samantala, nakakatuwang isipin na compatible ang birth date mong 4 ang birthday ng pinsan mo na 10 o 1 (ang 10 ay 1+0=1). Kung saan, ang mga may dala ng numerong uno (1) tulad ng 1, 10, 19, at 28 tulad ng pinsan mo ay siyang nakakatulong sa mga taong may numerong kuwatro (4) tulad ng 4, 13, 22 at 31 tulad mo, kaya walang duda na bibigyan ka niya ng suwerte at sa kabilang banda, suwerte ka rin sa kanya.
Ika nga, “vice-versa” ang inyong kapalaran – bigayan ng suwerte at bawasan ng kamalasan.
Hindi lang ang numerong 1 at 4 ang magkatugma. Sa halip, ang zodiac sign mong Aries ay angkop din sa zodiac sign na Libra ng iyong pinsan, sapagkat ang Aries at Libra ay “complementary compatible” sa isa’t isa. Ibig sabihin, ang mga bagay na mawala sa iyo ay maibibigay niya, habang ang mga bagay na hinahanap niya ay matatagpuan naman niya sa iyo. Ang ikinaganda pa nito, ikaw din ang huhusto sa kanya sa mga bagay na wala siya at siya rin ang huhusto sa iyo sa mga bagay wala ka.
Kaya ngayon, sipagan at pagbutihin mo pa ang pag-aayos ng mga papeles at pag-a-apply sa abroad.
Sapagkat ayon sa iyong Travel Calendar, nakatakda na ang magaganap, sa huling hati ng taong ito, sa buwan ng Nobyembre o Disyembre, pinakatamatagal sa unang araw ng January 2025, matutupad na rin sa wakas ang iyong pangarap – sa tulong ng iyong pinsan, makakapag-abroad ka na rin sa wakas, hanggang sa tuluy-tuloy ka na ring umunlad.
Commentaires