ni Erlinda Rapadas @Teka Nga | Jan. 18, 2025
Photo: Jillian Ward at Sofia Pablo - Instagram
Ayon sa kuwento ni Sofia Pablo nang mainterbyu ni Nelson Canlas para sa segment niya sa GMA Integrated News, apat na taon niyang hindi kinausap ang Kapuso actor na si Will Ashley.
Magkakasama sila noon nina Jillian Ward at Althea Ablan sa afternoon soap na Prima Donnas (PD) at okey ang kanilang samahan hanggang sa matapos ang serye.
Kaya ganoon na lang ang pagtataka ni Sofia nang mabago ang lahat at bigla na lang silang hindi nagkaroon ng komunikasyon.
Pero may ilang insiders ng PD ang nag-chika na si Will ang pinag-awayan nina Jillian at Sofia. Pareho raw silang nagkagusto kay Will, pero mas close si Will kay Sofia, kaya nasira ang dating magandang friendship ng PD stars.
Ngayon ay may bagong serye sa GMA Network si Sofia Pablo, ang Prinsesa ng City Jail (PCJ) kapareha si Allan Ansay.
Si Jillian naman ay may tatlong leading men sa My Ilongga Girl (MIG), pero mas marami ang nagsasabing mas may chemistry sila ni Michael Sager.
So, nasaan na ngayon si Will Ashley?
SA unang gabi ng burol ni DV Savellano sa kanilang bayan sa Cabugao, Ilocos Sur, marami ang nagulat sa husay ni Dina Bonnevie sa pagsasalita ng Ilocano dialect.
Ilocano ang ginamit na lengguwahe ni Dina sa kanyang pag-welcome at pagpapasalamat sa lahat ng dumating upang makiramay.
Sa loob ng 12 taon na pagsasama nina Dina at DV, natuto na ang aktres magsalita ng Ilocano dialect. Kaya napalapit na rin siya sa mga constituents ng kanyang yumaong mister.
Maging sa pamilya ni DV ay close si Bonnevie. Pumayag siyang sa Cabugao, Ilocos Sur
ilagak ang kanyang mister.
Sa panahon ng kanyang pagluluksa, naramdaman ni Dina ang pagdamay ng lahat. Ang malungkot lang ay hindi na nila makakasama ang kanyang mister sa kanyang kaarawan sa January 27.
Niyayaya si Ms. D ng kanyang anak na si Danica Sotto-Pingris na magbakasyon sa Switzerland upang dalawin ang kanyang lola (Dina’s mom) na ngayon ay 88 years old na.
MARAMING viewers ng Pepito Manaloto (PM) ang nagtatanong kung puwede kayang mag-guest sa sitcom sina Bea Binene at Inah de Belen? Sila kasi ang dalawang babaeng naugnay kay Jake Vargas (Chito).
Si Bea ay naging GF at ka-love team ni Jake noong nag-uumpisa pa lamang siya sa GMA-7. Hindi nga lang nagtagal ang kanilang relasyon at nagkani-kanya ng landas ang kanilang career.
Si Inah (anak nina Janice de Belen at John Estrada) ay nobya ni Jake. Two years na silang nagli-live-in. Pareho na silang nasa tamang edad, kaya tanggap ng lahat ang kanilang relasyon at ang hindi nila pagpapakasal.
Anyway, parang sa takbo ng kuwento ng PM ay hindi pa pumapasok ang posibilidad ng pag-aasawa ni Chito (Jake). May mga nililigawan pa lamang siya, samantalang si Clarissa ay may mga crush na rin.
Sa PM na lumaki at nagdalaga si Angel Satsumi (Clarissa). Ganu’n na katagal tumatakbo ang family sitcom nina Michael V. at Manilyn Reynes.
Comments