KIM, UMAMING KANI-KANYA SILA NI XIAN SA PASKO

ni Nitz Miralles @Bida | November 29, 2023

Hindi naggi-give-up ang ilang KimXi fans nina Xian Lim at Kim Chiu na maaayos pa nila ang kanilang problema kung anuman ‘yun.

Hanggang pina-follow daw nina Xian at Kim ang isa’t isa at hanggang hindi nila dine-delete ang photos nila sa kani-kanyang Instagram, hindi sila maniniwalang break na ang dalawa.

Kaya lang, sa nabanggit ni Kim na for this Christmas, dito lang siya sa bansa at ang kanyang pamilya ang makakasama, nag-isip na naman ang KimXi fans. Nasanay sila na every Christmas, sa ibang bansa nagse-celebrate ng Pasko sina Xian at Kim, bakit daw biglang nabago this year kung kailan pa nababalitang hiwalay na sina Kim at Xian?

Kaya ayun, nalungkot na naman ang KimXi fans na hindi magkakasama sa Pasko ang mahal nilang love team.