ni Ador V. Saluta - @Adore Me! | May 23, 2022
Sa latest Showbiz Update vlog ng talent manager-vlogger na si Ogie Diaz with Mama Loi bilang kanyang partner, naging sentro ng usapan ang It's Showtime host na si Vice Ganda at ang tsikang posibleng magtrabaho sa karibal na Kapuso Network ang Unkabogable Star.
Ayon kay Mama Loi, nakipag-meeting daw kasi si Vice kay Direk Bobot Mortiz, dating Kapamilya director ng ilang sikat na shows sa ABS-CBN, pero ngayo'y consultant ng ilang GMA-7 shows, kaya't nabuo ang tsikang baka raw may gagawing programa sa karibal na istasyon si Vice.
As for Mama Ogs (tawag kay Ogie), ibinahagi nito ang umano'y alam sa nangyaring meeting sa pagitan nina Vice at Direk Bobot.
Malakas ang espekulasyon na baka ang meeting ng dalawa ay para kunin ni Vice ang nabakanteng time slot ng programang Wowowin ni Willie Revillame.
Matatandaang iniwan ni Willie ang nasabing time slot dahil sa paglipat nito sa AMBS Network na na-acquire ni dating Sen. Manny Villar.
Paliwanag ni Ogie, "Ang nakarating sa akin, sabi ng isang common friend namin ni Direk Bobot, parang tungkol sa show abroad na pinag-uusapan ng dalawa. 'Yun lang 'yun, pero hindi ko alam kung bukod pa ru'n, eh, nag-usap pa sila tungkol doon sa chismis na lilipat na si Vice,” ani Ogie.
Ikinonek ng ilang netizens na baka raw may tampo si Vice kay Tita Cory Vidanes, head ng ABS-CBN Entertainment, dahil sa hindi raw pagsipot ni Vice sa birthday celebration ni Tita Cory na ginanap ilang linggo na ang nakararaan.
Dahil sa tsismis na ito, curious tuloy ang ilang "Marites" kung expired na ba ang kontrata ni Vice sa Kapamilya Network?
Depensa naman ng ilang netizens, nakikita o napapanood nila ang latest episodes ng It's Showtime at tipong masaya naman ang main host ng show sa mga kaganapan. Kumbaga'y walang tensiyon na nakikita sa paligid ng It's Showtime family.
Naniniwala naman ang karamihan na may kontrata man o wala, hinding-hindi iiwanan ni Vice ang istasyon dahil bukod sa pagkilala at pagbibigay ng pagkakataong maging sikat na host at artista, kilala rin si Vice na may palabra de honor at gaya ng paulit-ulit nitong sinasabi na mananatili siyang Kapamilya forever.
Maaalalang sinabi pa ni Vice na, "Gusto ko nga po sana, 50 years na ang pipirmahan kong kontrata para isahan na lang," nu’ng huli siyang pumirma ng kontrata sa ABS-CBN.
Marami nang ups and down si Vice sa istasyon pero nananatili pa rin siyang Kapamilya base na rin sa kanyang mga deklarasyong siya'y forever Kapamilya.
Comments