Kasambahay na makaka-gradweyt ng kolehiyo, yayaman pa sa 2045

ni Maestro Honorio Ong - @Kapalaran ayon sa Palad | November 27, 2022

KATANUNGAN

1. Ako ay namamasukan bilang katulong, nagkasakit ako, pero nandito pa rin ako sa amo ko dahil hindi naman malala ang sakit ko. Balak kong umuwi sa probinsya para magpahinga, kaya lang, natatakot ako na pagbalik ko ay hindi na ako magkaroon ng trabaho rito sa Maynila.

2. Ang isa pang gumugulo sa isipan ko ay ang paghinto ko sa pag-aaral. Gusto kong ipagpatuloy ang pag-aaral ko sa college, gayung dapat ay third year na ako. Mangyayari ba ang balak kong ito at may tsansa bang makatapos ako ng kolehiyo para magkaroon ng magandang trabaho at hindi puro pagkakatulong ang napapasukan ko?

3. Maestro, ano ang nakikita n’yo sa guhit ng mga palad ko, may pag-asa pa ba akong makaahon sa kahirapan at umasenso?

KASAGUTAN

1. Basta huwag kang mawawalan ng pag-asa, sa halip ay magpatuloy kang magsikap, tiyak ang magaganap dahil darating ang panahon na maaabot mo rin ang lahat ng iyong mga ambisyon sa buhay.

2. Samantala, sadyang huminto ang Fate Line na tinatawag ding Career Line (Drawing A. at B. F-F arrow a.) sa kaliwa at kanan mong palad. Bahagya lang itong tumigil dahil matapos huminto, agad itong nagpatuloy (F-F arrow b.) hanggang sa tuluyang makasampa sa Mount of Saturn, na tinatawag ding Bundok ng Tagumpay (arrow c.).

3. Tanda na nakatakda na sa iyo ang magpahinga at pagkatapos ng sandaling pamamahinga, parang isang buwelo lamang, pagbalik mo sa Maynila ay muli kang magkakaroon ng trabaho. Gayundin, dahil naging dalawa ang dating iisang Fate Line (F-F arrow d.), posibleng habang nagtatrabaho ka ay makakapag-aral ka pa, hanggang sa tuloy-tuloy na matapos ang kursong kinuha mo. Ito ay pinatunayan din ng malinaw at mahabang Effort Line (Drawing A. at B. E-E arrow e.), na agad sumampa at nakatuntong sa Mount of Jupiter, na tinatawag ding Bundok ng Katuparan (arrow e.).

4. Ibig sabihin, basta palagi mong pinaiiral ang ugaling masikap at malakas ang loob, sa malapit na hinaharap, sa iyong matindi at masigasig na pagsisipag, na kinumpirma ng birth date mong 26, walang duda na darating ang panahong maaabot mo ang lahat ng mga pangarap mo sa buhay. Hindi lang ang makatapos ng pag-aaral at makaahon sa kahirapan ang iyong magagawa, dahil 26 o 8 (2+6=9) ang birth date mo, malaki rin ang posibilidad na ikaw ay yumaman.

MGA DAPAT GAWIN

1. Habang, ayon sa iyong mga datos, Sophia, matapos mong umuwi sa probinsya para magpahinga, sa susunod na taong 2023 at sa buwan ng Enero, tiyak ang magaganap, muli kang makakabalik sa Maynila at magkakaroon ng mas magandang trabaho.

2. Sa naturang trabaho, pagdating ng 2023 hanggang 2024, makakapag-enroll ka sa kolehiyo hanggang sa tuluyang matapos ang iyong kurso. Sa pamamagitan ng kursong ito na may kaugnayan sa negosyo at pinansyal, tuloy-tuloy kang uunlad, makakaahon sa kahirapan, hanggang sa lumago nang lumago ang iyong kabuhayan, na nakatakdang mangyari sa taong 2045 at sa edad mong 46 pataas.