ni Atty. Persida Rueda-Acosta @Magtanong Kay Attorney | July 8, 2024
Dear Chief Acosta,
Nakarating sa akin ang alegasyon na tumanggap ako ng halaga upang mapabilis ang aplikasyon ng isang kliyente. Aminado ako na wala akong awtoridad na tumanggap ng anumang bayad mula sa mga kliyente, at inabot ko lamang ang pera sa aming kahera. Ito ang kauna-unahang kaso ko sa aming kumpanya sa loob ng mahigit 15 taon na paglilingkod. Nang ako ay tanggalin, walang anumang halaga ang ibinayad sa akin, at ang dahilan ng kumpanya ay walang basehan para bayaran ako ng separation pay dahil mayroon silang sapat na dahilan para tanggalin ako sa trabaho. Tama ba na wala akong matatanggap kahit na 15 taon ako sa trabaho? – Rutherford
Dear Rutherford,
Ang iyong katanungan ay sinagot ng Korte Suprema sa kasong Central Pangasinan Electric Cooperative, Inc. vs. National Labor Relations Commission and Lito Cagampan, G.R. No. 163561, 24 July 2007. Sang-ayon sa Korte Suprema, sa panulat ni Kagalang-galang na Kasamang Mahistrado Leonardo A. Quisumbing:
“Section 7, Rule I, Book VI of the Omnibus Rules Implementing the Labor Code provides that when the employee is dismissed for any of the just causes under Article 282 of the Labor Code, he shall not be entitled to termination pay without prejudice to applicable collective bargaining agreement or voluntary employer policy or practice. Separation pay shall be allowed only in those instances where the employee is validly dismissed for causes other than serious misconduct or those reflecting on his moral character. Separation pay in such case is granted to stand as a ‘measure of social justice.’ If the cause for the termination of employment cannot be considered as one of mere inefficiency or incompetence but an act that constitutes an utter disregard for the interest of the employer or a palpable breach of trust in him, the grant by the Court of separation benefits is hardly justifiable.”
Malinaw sa nasabing desisyon na walang karampatang separation pay ang isang empleyado na tinanggal dahil sa just causes sa ilalim ng Labor Code, maliban na lamang kung ito ay nakasaad sa collective bargaining agreement, polisiya ng kumpanya, o naging kagawian na. Dagdag pa ng Korte Suprema, hindi awtomatikong basehan ang matagal na panahon ng paglilingkod upang bayaran ang isang empleyado ng separation pay, lalo na kung ang dahilan ng kanyang pagkakatanggal ay nagpapakita ng kawalan ng katapatan sa kumpanya. Dagdag ng Korte Suprema:
“Although long years of service might generally be considered for the award of separation benefits or some form of financial assistance to mitigate the effects of termination, this case is not the appropriate instance for generosity under the Labor Code nor under our prior decisions. The fact that private respondent served petitioner for more than twenty years with no negative record prior to his dismissal, in our view of this case, does not call for such award of benefits, since his violation reflects a regrettable lack of loyalty and worse, betrayal of the company. If an employee’s length of service is to be regarded as a justification for moderating the penalty of dismissal, such gesture will actually become a prize for disloyalty, distorting the meaning of social justice and undermining the efforts of labor to cleanse its ranks of undesirables.”
Sa nasabing desisyon, malinaw na ang paggawad ng separation pay bilang pagkilala sa social justice ay nakabase pa rin sa pagkakaroon ng sapat na batayan upang kilalanin ng kumpanya ang tapat na paglilingkod ng isang empleyado. Kung may pagtataksil na nakitang ginawa ang isang empleyado laban sa kanyang kumpanya, tulad ng hindi tamang pagtanggap ng bayad mula sa kliyente upang mapabilis ang kanyang aplikasyon, walang basehan na magkaloob ng separation pay.
Mahalagang tandaan na ang paggawad ng separation pay ay hindi lamang simpleng pagkilala sa taon ng serbisyo ng isang empleyado, kundi isang mekanismo upang maibsan ang epekto ng pagkawala ng trabaho. Ito ay kadalasang iginagawad sa mga kaso ng authorized causes ng termination tulad ng retrenchment o redundancy. May mga pagkakataon na ito ay iginagawad din bilang pagkilala sa social justice, ngunit ito ay hindi nakabase lamang sa mahabang panahon ng pagsisilbi.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
Comments