ni Bong Go @Bisyo Magserbisyo | July 14, 2024
Sa mga graduation na ating dinaluhan, may isang bagay na paulit-ulit kong naririnig mula sa mga graduating student na nakakausap natin. Bukod sa makatapos ng pag-aaral sa eskwelahan, gusto rin nilang maka-graduate mula sa kahirapan.
Edukasyon ang puhunan natin sa mundong ito. At ang mga kabataan ang kinabukasan at future leaders ng ating bayan. Obligasyon nating nakatatanda na ituro at gabayan sila sa kanilang paglabas sa mas malawak na mundo. At sa hangarin nilang makamit ang mga pangarap, pabaon nating mensahe, “Never stop chasing your dreams. Go lang nang go!”
Sa ginanap na 22nd Commencement Exercises ng Gordon College sa Olongapo City, Zambales noong July 11 na naimbitahan ako bilang guest speaker, isang pagbati at paghanga sa mga nagsipagtapos dahil sa kanilang determinasyon sa kabila ng maraming hamon.
Kinilala rin natin ang sakripisyo ng mga magulang ng mga nagsipagtapos. Pinapurihan natin ang mga guro sa kanilang commitment na maibigay ang dekalidad na edukasyon. Bilang adopted son ng Zambales, patuloy ang ating suporta para sa edukasyon ng mga mag-aaral sa lalawigan. Mayroon tayong siyam na scholars na tinutulungan sa naturang kolehiyo.
Bilang keynote speaker sa University of Perpetual Help System-Delta Calamba Campus 7th Senior High School Commencement Exercises noong July 12, at sa paanyaya ng university president na si Jose Anthony Tamayo at school director, Dr. Ernesto Ramirez, ibinahagi rin natin sa mga mag-aaral ang paborito nating motto: Gawin ang tama, unahin ang kapwa, at hinding-hindi ka riyan magkakamali!
Nagbigay din tayo ng mga graduation gift packs sa lahat ng graduates pati na rin sa mga faculty at staff, habang may dagdag na tulong akong personal na ibinigay sa topnotchers at piling mag-aaral.
Noong administrasyon ni dating Pangulong Rodrigo Duterte, naisabatas ang Republic Act No. 10931, o ang Universal Access to Quality Tertiary Education Act. Tumulong tayong maisakatuparan ito bilang special assistant to the president noon. Sa pamamagitan nito, naging abot-kaya ng mga estudyante sa buong bansa ang makapag-aral sa kolehiyo. Dahil sa tagumpay ng RA 10931, isinusulong natin ngayon sa Senado ang Senate Bill No. 1360 bilang co-author at co-sponsor upang mas mapalawak ang sakop ng Tertiary Education Subsidy.
Co-author at co-sponsor din tayo ng RA 11984, o ang No Permit, No Exam Prohibition Act, at pati ng RA 11997, o ang “Kabalikat sa Pagtuturo Act,” na naging ganap na mga batas kamakailan lang.
Bilang chair ng Senate Committee on Health, ipinanunukala natin ang SBN 1786 na naglalayong atasan ang public higher education institutions na magtatag ng mental health offices sa kanilang mga campus. Co-author at co-sponsor din tayo ng SBN 220 o ang Basic Education Mental Health and Well-Being Promotion Bill. Isinusulong din natin ang SBN 1864, o ang “Student Loan Payment Moratorium During Disasters and Emergencies Act.”
Bilang chair ng Senate Committee on Sports, naisabatas ang ating prayoridad na RA 11470 na nagtatag sa National Academy of Sports (NAS) noong 2020. Tayo ang isa sa may-akda at co-sponsor nito. Sa NAS, napagsasabay ng student-athletes ang pagsasanay at pag-aaral nang walang nasasakripisyo.
Ang lagi kong bilin sa mga kabataan, gamitin ang kanilang napag-aralan para mas makapagserbisyo sa kapwa. Inilahad ko sa kanila ang aking paniniwala na ang serbisyo sa tao ay serbisyo sa Diyos.
Kaya noong July 10 ay personal kong binalikan ang mga kababayan nating nabiktima ng sunog sa Barangay 330, Sta. Cruz, Maynila, para bigyan sila ng karagdagang tulong, kasama ang National Housing Authority na nagpamahagi ng emergency housing assistance na ating isinulong para may pambili ng materyales ang mga biktima na pampaayos ng kanilang mga bahay.
Sa ating pagbisita sa Zambales noong July 11, bago ang graduation ceremony, ay personal nating pinangunahan ang pamamahagi ng suporta sa 500 nawalan ng hanapbuhay, katuwang si Olongapo Mayor Rolen Paulino Jr. Ang mga kuwalipikadong benepisyaryo ay mabibigyan din ng DOLE ng pansamantalang trabaho.
Sa araw ding iyon ay idinaos na ang inagurasyon ng Super Health Center sa San Ricardo, Southern Leyte. Dinaluhan ito ng aking opisina kasama si Mayor Roy Salinas.
Naimbitahan naman tayo sa ginanap na Ugnayang Nagkakaisang Manggagawa (UNM) UST Hospital 10th Anniversary, sa paanyaya ni UPHUP Spokesperson and UNM Chair Ronald Ignacio at iba’t ibang health workers union presidents. Ibinahagi ko sa kanila na laging bukas ang aking opisina upang maging avenue para mapakinggan ang kanilang mga hinaing.
Hindi rin tumitigil ang aking Malasakit Team sa paghahatid ng tulong sa mga kababayan nating nangangailangan tulad ng mga nawalan ng hanapbuhay kabilang ang 50 residente ng Bay, Laguna katuwang si LGBTQ+ Leader Mhel Evangelista; 84 sa Alaminos, Laguna katuwang si Mayor Glenn Flores; 84 sa Carmona City, Cavite kaagapay si Mayor Dahlia Loyola; 169 sa Pangil, Laguna kasama si Mayor Gerald Aritao; 488 sa Sison, Pangasinan katuwang ang iba’t ibang barangay officials. Sa Romblon, natulungan din ang 265 sa Magdiwang, 301 sa Cajidiocan, at 76 pa sa San Fernando katuwang ang mga local official na sina Mayor Greggy Ramos, Mayor Nanette Tansingco, at Mayor Arthur Tansiongco. May pansamantalang trabaho rin na ibibigay ang DOLE sa mga kuwalipikadong benepisyaryo.
Tinulungan ng aking opisina ang 20 residente ng Mambajao, Camiguin na nasunugan. Binalikan natin ang mga nawalan ng tahanan gaya ng 27 sa Cagayan de Oro City. Bukod sa hatid nating tulong, makatatanggap din sila ng tulong pinansyal mula sa NHA pambili ng mga pako, yero, semento at iba pang materyales.
Sa Cebu, naging benepisyaryo natin ang mga maliliit na negosyante kabilang ang 50 sa Talisay City katuwang si Mayor Gerald Anthony Gullas; 45 sa Minglanilla katuwang si Mayor Rajiv Enad; 55 sa Dumanjug katuwang si Mayor Gungun Gica; at 50 sa Alegria katuwang si Mayor Gilberto Magallon. Sila ay nabigyan din ng tulong pangkabuhayan ng gobyerno.
Napagaan natin ang dalahin ng mga mahihirap na residente kabilang ang 1,000 sa Laoang, Northern Samar katuwang sina Mayor Hector Ong at Cong. Harris Ongchuan; at 1,000 residente mula sa South Upi, Maguindanao del Sur, kaagapay si Gov. Mariam Mangudadatu.
Dagdag pa riyan, nag-abot tayo ng tulong sa 22 TESDA scholars mula sa Manila City.
Minsan lang tayong daraan sa mundong ito. Kung anong kabutihan at tulong ang puwede nating ibigay sa ating kapwa ay gawin na natin ngayon. Bilang inyong Mr. Malasakit, saan mang sulok ng bansa at sa abot ng aking makakaya ay patuloy akong magseserbisyo sa inyo dahil bisyo ko ang magserbisyo.
Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.
Comments