ni Vinia Vivar @Frankly Speaking | October 24, 2023
Tawa kami nang tawa sa ginawang prank kay Ivana Alawi ng kanyang pamilya nang may ipakilalang boyfriend for the first time ang bunsong kapatid na si Mona Alawi at kitang-kita talaga kung paano nawindang ang aktres-vlogger.
Mapapanood sa latest vlog ni Ivana ang buong pangyayari magmula sa pagluluto nila ng lunch hanggang sa pagdating ng schoolmate ni Mona sa bahay na nagngangalang Jake Santos hanggang sa bonggang rebelasyon na ikinaloka ng aktres.
Sa simula, ang akala ni Ivana ay schoolmate lang ni Mona si Jake at may tinatapos lang ang dalawa na school project. Pagdating pa nga lang ng binata sa bahay nila ay kitang-kita na ngang naloka na ang aktres nang magpa-picture agad sa kanya ang guy.
Sumunod na ikinaloka ni Ivana ay ayaw kumain ni Jake at nagpa-fasting daw kasi siya. Makikita talaga sa reaksiyon niya na parang nawi-weirdo-han siya sa guy.
Maya-maya ay sinabi na ni Mona na nanliligaw ang guy sa kanya at kasunod nito ay biglang nagpaalam ang dalawa kay Ivana na pupunta sila ng Hong Kong nang sila lang dalawa.
Kitang-kita talaga na nagulat si Ivana although hindi naman siya gaanong nagtaray pa.
Siyempre, tutol ang aktres na payagan ang dalawa na mag-out of the country pero mas nawindang siya nang pumayag ang kanilang ina.
Mas lumala pa ang tensiyon nang sabihin ni Jake na girlfriend na niya si Mona hanggang sa nagtalo na ang magkapatid. In fairness kay Ivana, talagang pinipilit niyang maging cool na kung sa iba ‘yan ay baka nasapak na ang guy dahil sa pagka-antipatiko nito.
Pati ang nanay nila ay nagsalita kay Ivana na 19 naman na si Mona kaya payagan na.
Sa bandang huli ay hindi na talaga kinaya ni Ivana ang pagka-windang at nag-walkout na.
Although sinabi naman niya na papasok na siya sa kuwarto at matutulog na dahil pagod siya sa taping.
Sinundan ni Mona si Ivana sa kuwarto at may dalang flowers para suyuin ang kanyang ate. Dito na niya sinabi na “It’s a prank!”
Napamura talaga si Ivana ng “pu***na!” nang malaman na prank lang ang lahat at kasabwat ang kanyang buong pamilya.
In fairness, ang gagaling namang umarte ng pamilya ni Ivana, pati na si Jake dahil maiinis ka naman talaga sa kayabangan at pagiging maangas niya.
Sa pagiging beterana ni Ivana sa prank vlog, hindi niya nahalata na pina-prank na siya dahil pinatigil niya ang pagre-record ng camera. ‘Yun pala ay may isa pang hidden camera na hindi niya alam.
Ayon kay Mona ay ilang buwan nilang pinaghandaan ang prank kaya no wonder na na-perfect talaga nila ito.
Sa comment section ay pinuri ng mga netizens si Ivana sa pagiging protective ate nito at lahat sila’y aliw na aliw sa buong pamilya.
Comments