ni Jemuel C. Salterio @Talbog | Jan. 8, 2025
Naging usap-usapan kamakailan ang PBA player na si Juami Tiongson matapos niyang ibulgar na isa si Paolo Contis sa mga dahilan ng kanyang hiwalayan sa aktres na si Arra San Agustin.
Sa isang candid interview kasama ang ilang PBA players ng San Miguel Beer (SMB), tila hindi napigilan ni Juami na maglabas ng saloobin tungkol sa umano’y papel ni Paolo sa pagguho ng kanilang relasyon ni Arra.
Ayon kay Juami, nagsimula ang tensiyon nang maging close sina Paolo at Arra sa set ng mga palabas na Bubble Gang (BG) at Tahanang Pinakamasaya (TP).
“Feeling ko talaga, may something fishy sa closeness nila,” ani Tiongson.
Ibinunyag pa niyang madalas magdala ng mga regalo si Paolo para kay Arra at palaging nagbibigay ng special attention sa aktres.
Bagama’t ilang beses idiniin ni Arra na wala silang malalim na koneksiyon ni Paolo, aminado si Juami na hindi niya maiwasang magselos. Dito na raw nagsimula ang sunud-sunod nilang away na kalaunan ay naging dahilan ng kanilang hiwalayan.
Si Paolo ay isang natural na charmer sa set. Sa likod ng kamera, tila si Paolo ang nagbibigay ng kulay sa araw ni Arra.
Ayon sa mga chika mula sa production team ng BG, madalas umupo si Paolo sa tabi ni Arra tuwing break. Ang kanilang tawanan at kuwentuhan ay nagiging sentro ng atensiyon ng lahat.
“Parang feel na feel talaga ni Paolo si Arra,” sabi ng isang source.
Dagdag pa ng source, naging mas ganado raw si Paolo sa trabaho dahil kay Arra.
Hmmm… kilig-kiligan much?
Wala na nga ba sila ni Yen Santos? Habang iniintriga ang ugnayan nina Paolo at Arra, muling lumutang ang balita tungkol sa umano’y paghihiwalay nina Paolo at Yen Santos.
Nagsimula ang espekulasyon nang mag-delete si Yen ng kanilang mga larawan sa social media at i-unfollow si Paolo.
Pero teka, may pasabog — ayon sa nanay ni Yen, never daw naging sila ni Paolo.
“Magkaibigan lang sila, ‘noh!” saad nito, na tila nagpapahiwatig na baka nagkaroon lang ng misunderstanding ang publiko tungkol sa kanilang relasyon.
Ngunit ang tanong, may kinalaman kaya si Arra sa diumano’y split nina Paolo at Yen?
Ayon sa isang insider, tila naging malapit sina Paolo at Arra sa mga huling buwan ng taping ng BG. Naging mas sweet umano si Paolo kay Arra, dahilan para magduda ang marami.
Isang source pa ang nagdagdag na si Arra raw ang ‘bagong inspirasyon’ ni Paolo. ‘Kaloka, ‘di ba?
Sa gitna ng lahat ng kontrobersiya, mariing itinanggi ni Arra na si Paolo ang kanyang 'secret boyfriend'.
Aniya, “Nakaka-pressure naman ‘yung mga intriga! Wala po akong boyfriend ngayon, work lang focus ko.”
Pero siyempre, hindi pa rin maawat ang mga Marites sa paghabi ng sariling teorya.
Samantala, tuluyan nang naglabas ng hinanakit si Juami. Hindi na siya makatiis.
Sa huli, ramdam ang sakit sa boses ni Juami nang magbahagi ng mensahe tungkol sa nangyari.
“Ginawa ko lahat para maging okey kami, pero mahirap kapag may third party na pumapasok,” saad niya.
Sinabi rin niyang sana’y maging masaya na lang si Arra, kahit pa masakit para sa kanya ang mga nangyari.
Habang patuloy na umiinit ang kontrobersiya, marami ang nag-aabang kung magsasalita rin ba sina Paolo o Arra tungkol sa isyu.
Makakakuha kaya tayo ng closure sa chika levels to the max na ito o mananatiling isang malaking misteryo ang lahat?
Abangan ang susunod na kabanata! ‘Yun na! Ambooolancia! #ChairmanNgChikahan #MaritesInChief #Talbog
Comments