ni Maestro Honorio Ong @Forecast | January 17, 2023
Ipagpatuloy natin ang pagtalakay sa mga pangunahing katangian at kapalaran ng animal sign na Dragon.
Ang Dragon ay silang mga isinilang noong 1928, 1940, 1952, 1964, 1976, 1988, 2000, 2012 at 2024.
Sa 12 animal signs na naglakbay sa palasyo ni Lord Buddha, sinasabing Dragon ang isa sa mga pinakapopular, kamangha-mangha ang pagkatao at sobrang maraga at malakas ang dating. Tandaan din na ang mga Dragon ay isa sa pinakamapalad at masuwerte sa lahat ng animal signs.
Kaya sa taong ito ng 2023 o Year of the Water Rabbit, walang duda na ang mga taong isinilang sa animal sign na Dragon ay siguradong ngingitian ng maraming suwerte at magagandang kapalaran, lalo na sa pinansyal at pag-ibig.
Kung noong nakaraang taon ay madamot ang kapalaran sa mga Dragon, ngayong 2023, ang magandang kapalaran ay galante at bulto-bultong darating sa mga Dragon. Kung may mga suwerteng kapalaran na dumating sa Dragon noong nakaraang taon, sa taong ito, mas marami pang buwenas at magagandang oportunidad ng pagkakakitaan ang sabay-sabay at hindi matapos-tapos na darating sa kanya.
Kaya ang mga Dragon na iniiwasan ang lipunan noong nakaraang taon at hindi masyadong lumalabas ng bahay ay dapat nang maglalabas ngayong 2023 dahil tulad ng nasabi na, maraming nagkalat na suwerte sa daan at madali lang nilang pupulutin ang mga ito, kung saan matagal nang inilaan sa kanila nang langit.
Tunay nga na kung noong nakaraang taon ay hindi makakilos ang Dragon, ngayong Year of the Water Rabbit o Kuneho, tuloy-tuloy at malaya na niyang maipapatupad ang lahat ng kanyang mga balak at pangarap sa buhay. Gayundin, ang mga pangarap na ito ay madali naman niyang maisasakatuparan bago matapos ang 2023.
Gayunman, hindi lang sa mga proyekto at pangarap magtatagumpay at sisigla ang buhay ng Dragon ngayong 2023. Bagkus, kung tameme o matamlay at walang kabuhay-buhay ang love life ng Dragon sa nakaraang taon, sa taong ito, sisigla ang romansa at masasarap na karanasan sa pag-ibig ang siguradong malalasahan at matitikman ng naglalaway na Dragon.
Kaya sa pag-ibig, kung medyo hindi masaya noong 2022, ngayong 2023 ay tunay na magiging masaya at romantiko ang mga karanasang panseksuwal at aspetong pag-ibig ang dadating sa isang Dragon. Kung may mga nakaraang pagtatalusira, ang mga nakaraang kabiguan ay magiging simula ng mas masaya at bagong pakikipagkaibigan ngayong 2023, na sigurado namang magbubunga ng ligaya at tagumpay.
Sa pag-ibig at pakikipagrelasyon, magiging maligaya naman ang karanasan ng Dragon sa taong ito ng 2023. Kaya mainam ding mag-asawa o magpakasal ngayong Year of the Water Rabbit ang mga Dragon, lalo na kung ang kanyang makakaisang-dibdib ay kapwa niya Dragon, Unggoy, Tandang o Daga.
Paborable namang mag-asawa, magpakasal o mag-honeymoon ngayong 2023 ang Dragon, higit lalo kung ang pulot-gata ay isasagawa sa buwan ng Abril, Agosto, Setyembre at Disyembre.
Sa buong taong ito ng Water Rabbit, ang magiging paborableng panahon naman ng Dragon ay mula sa ika-4 ng Abril hanggang sa ika-10 ng Mayo, mula sa ika-1 ng Agosto hanggang sa ika-31 ng Agosto, mula sa ika-1 ng Setyembre hanggang sa ika-28 ng Setyembre at mula sa ika-25 ng Nobyembre hanggang sa ika-28 ng Disyembre.
Itutuloy
Comentários