ni Pablo Hernandez @Prangkahan | Mar. 16, 2025
MAJORITY NG PINOY GUSTONG MA-IMPEACH SI VP SARA? -- Sa latest survey na inilabas ng Pulse Asia ay 4 daw sa 10 Pinoy ang kontra na ma-impeach si Vice President Sara Duterte-Carpio.
Kung apat ang tutol, lumalabas na anim ang pabor, kung ganu’n majority pala ng mga Pinoy ay gustong ma-impeach si VP Sara, period!
XXX
HINDI NGA NAKIPAGTULUNGAN ANG MARCOS ADMIN SA ICC, NAKIPAGTULUNGAN NAMAN SA INTERPOL KAYA RESULTA, KULONG SI EX-P-DUTERTE -- Hanggang ngayon ay pinuputakti ng batikos si Pres. Bongbong Marcos (PBBM) dahil niloko lang daw nito ang taumbayan sa sinabi noon na hindi makikipagtulungan ang Marcos administration sa International Criminal Court (ICC), ‘yun daw pala nakipagtulungan sa Interpol kaya naaresto at ikinulong si ex-P-Duterte sa The Hague sa The Netherlands.
Dahil diyan, ipinagtanggol ni Presidential Communication Office (PCO) Usec. Claire Castro si PBBM na ayon sa kanya ay totoo naman daw ang sinabi ng Presidente na hindi ito makikipagtulungan sa ICC, pero dapat daw tandaan ng mamamayan na wala naman daw sinabi ang Pangulo na hindi rin ito makikipagtulungan sa Interpol.
Malinaw na pinaikut-ikot lang ni PBBM ang mamamayan sa isyung ito kasi hindi nga nakipagtulungan ang Marcos admin sa ICC, pero nakipagtulungan naman sa Interpol na nagdala ng warrant of arrest ng ICC laban kay ex-P-Duterte, boom!
XXX
KUNG HINDI TAMANG MAGPAPATAY NG LIBU-LIBONG TAO, PARANG SINABI NI PBBM NA TAMA ANG PAG-ARESTO AT PAGKULONG KAY EX-P-DUTERTE -- Sa idinaos na campaign rally ng senatorial slate ng Alyansa Para sa Pagbabago sa Tacloban City nitong nakalipas na Marso 14, 2025 ay pinasaringan ni PBBM si ex-P-Duterte na nakakulong ngayon sa ICC jail, na ayon sa Presidente ay wala raw sa mga kandidato niya ang nananakot at naninigaw, at ang kanilang alyansa raw ay hindi naniniwala na ang solusyon sa paglaban sa droga at kriminalidad ay pagpatay ng libu-libong tao, dahil ayon sa Pangulo ay hindi raw tama ‘yung ganu’ng sistema.
Kumbaga, parang sinabi na rin ni PBBM na tama lang ang nangyari kay ex-P-Duterte na makulong sa ICC jail, kasi nga hindi tama ang pumatay o magpapatay ng libu-libong tao, period!
XXX
SI SPEAKER ROMUALDEZ ANG NAGSABING MANANALO SA TACLOBAN AT LEYTE ANG MGA ‘MANOK’ NI PBBM SA PAGKA-SENADOR, HINDI MAMAMAYAN NG LUNGSOD AT LALAWIGAN -- Ibinida ni Speaker Martin Romualdez na mananalo raw sa Tacloban City at buong Leyte ang 12 kandidato ni PBBM sa pagka-senador.
Si Speaker Romualdez ang nagsabi niyan, hindi ang mayoryang mamamayan ng Tacloban City at Leyte, boom!
Komentar