Galdones sa Angels ng PVL, Gonzaga, balik HD Spikers

ni Gerard Arce @Sports | June 5, 2023

Nagawa na ring makipagsabayan ng 2023 All-Filipino Conference runner-up Petro Gazz Angels ng kunin ang serbisyo ni dating University of Santo Tomas Golden Tigresses middle blocker Kecelyn Galdones para sa Invitational Conference ng Premier Volleyball League (PVL) simula Hunyo.

Matapos magpirmahan ang iba’t ibang koponan sa mga graduating collegiate athletes sa University Athletic Association of the Philippines (UAAP), gayundin ang mga bigating free agents ng liga, tinapik ng Angels ang 23-anyos na middle blocker upang makakuha ng karagdagang depensa bilang paghahanda sakaling umalis si Mar Jana Phillips matpos kunin ng Gwangju Al Peppers sa Korean Volleyball League.

“Unlocking a new chapter of volleyball excellence. Embrace the excitement as we welcome our newest player to the squad, KC Galdones!,” ayon sa Facebook post ng kanilang koponan.

Naging mainit ang pagtanggap at pagsalubong ng koponang Cignal HD Spikers sa pagbabalik ni Sgt. Jovelyn “Bionic Ilongga” Gonzaga matapos magserbisyo sa Philippine beach volleyball team at lumipat ng ibang koponan ng mahigit dalawang taon.

Sasabak muli sa indoor taraflex court ang 31-anyos mula Jordan, Guimaras matapos magpahinga ng isang kumperensya sa 2023 Premier Volleyball League (PVL) upang katawanin ang bansa at maghanda para sa nakalipas na 32nd Southeast Asian Games sa Phnom Penh, Cambodia nitong Mayo. “Adding more firepower to our already awesome roster. The Bionic Ilongga is back in #Awesomenation,” ayon sa kanilang Facebook reels.

Pormal ng pinayagang makabalik sa indoor volleyball ang 5-foot-8 opposite hitter upang maglarong muli sa HD Spikers na pinaglaruan niya simula nung 2017 sa Philippine Super Liga, hanggang sa lumipat ito sa Army Black Mamba Lady Troopers nung 2020 Premier Volleyball League Open Conference sa bubble tournament sa PCV Socio-Civic and Cultural Center sa Bacarra, Ilocos Norte.