ni Maestro Honorio Ong @Forecast | Jan. 4, 2025
Sa pagpapatuloy ng Forecast 2025, tulad ng natalakay natin kahapon, ang taong 2025 ay siya ring numerong 9, lalo na kapag ito ay gagawing single digit. Nangyaring ganu’n, dahil ang 2025 ay 20+25=45 at ang 4+5=9.
Pagdating naman sa Astro-Numerology na pag-aanalisa, isaalang-alang din natin ang numerong 9 na may kaakibat na Planetang Mars at kilala ito bilang God of War, ito ay nagpapahayag ng aksyon, pagkilos, pakikihamok at labanan. Kaya ang numerong 9 ay kinakategorya bilang isa sa mga super strong number.
Ibig sabihin sa pandaigdigang kalagayan, maraming malalaki at mabibilis na kaganapan ang magaganap sa aspetong pang-ekonomiya, politika, siyensya at medisina. Ganundin sa larangan ng environment o pisikal na anyo ng daigdig o mundo.
Kaya anumang nakakabiglang kaganapan ang mangyari ngayon, hindi ka dapat magulat o mabigla. Dahil ang mga nakagigilalas at kahanga-hangang pangyayari ay sadya at pangkaraniwan lang na dala-dala o bitbit ng mga taong may numerong 9.
Sa madaling salita, negatibo at positibong sorpresa ng kapalaran ang tiyak na magaganap sa susunod na mga araw at buwan sa buong taong ito ng 2025.
Sa personal mo namang kalagayan, kung ikaw ay isinilang sa petsang 9, 18, at 27, ganundin silang ka-affinity o ka-compatible ng “Taong Nine” o ‘yung mga isinilang sa petsang 3, 12, 21, 30, 6, 15 at 24 – umasa kang ngayon na rin magaganap ang favorable year mo, gayunman kahit pa akalain mong pangit ang mangyayari sa iyo, kung magiging positibo naman ang pagtanggap mo sa mga negatibong kaganapang mangyayari, isang malaking sorpresa ng magandang kapalaran ang nakalaan pa rin sa iyo.
Isang konkretong halimbawa nito ay bigla kayong magkakahiwalay ng dyowa mo, aakalain mong magiging negatibo ang dulot nito sa kapalaran mo, pero sa kabila nito ay magiging positibo rin ang magiging pananaw mo sa buhay, bagkus, ‘yung hiwalayan n’yo pa ang maghahatid sa iyo sa mas maunlad at maligayang pakikipagrelasyon.
Samantala, kahit sa aspetong pampinansyal. Maaaring baon ka sa utang ngayon o ‘di kaya naman ay iniinda mo pa rin ang nakaraang panloloko sa iyo ng isang malapit na kakilala o kaibigan, pero kung magiging positibo lamang ang iyong pakiramdam o pananaw, sa halip na labis na ma-depress, ‘yun pa ang magtutulak sa iyo upang mas lalo pang mag-ingat sa paghawak ng pera hanggang sa umunlad at yumaman ka.
Ganu’n ang posibleng mangyari sa iyo ngayong 2025. Ang mga kalungkutan at pagtitiis na nararanasan mo ngayon ay isa lang gift wrap o pambalot ng regalo, na akala mo sa simula ay pangit, pero ‘pag tiningnan o pagminulat mo ng iyong mga mata, sobrang gandang kapalaran pala ang inilaan sa iyo ng langit.
Kaya tandaan mo, anumang senaryo at pangyayari ang dumating sa iyong buhay, hindi ka dapat ma-depress, malungkot o panghinaan ng loob, dahil tulad ng nasabi na – kapag naging positibo lang ang pananaw mo sa buhay, ang lahat ng inaakala mong pangit na pangyayari ay mako-convert sa isang sorpresa at napakagandang kapalaran na regalo sa iyo ng langit sa taong ito ng 2025.
Itutuloy….
MGA NUMERONG SUSUWERTEHIN NGAYONG YEAR OF THE GREEN WOOD SNAKE
Jan. 3, 2025
Maraming nagtatanong kung ano nga raw ba ang magiging pangunahing kaganapan ngayong 2025, partikular sa nating naririnig at sinasabing, “Ano kaya ang magiging kapalaran ko sa taong ito, uunlad na kaya ako at isa-isa na bang matutupad ang mga dalangin ko sa aking buhay?”
At may katanungan din sa akin ang isang beki sa beauty parlor na palagi kong pinapasyalan, “Tatama na ba ‘ko sa lotto ngayong 2025, Maestro?”
Ang mga tanong na ‘yan ay ilan lamang sa marami pang diskusyon hinggil sa Forecast 2025, ang ipaglilingkod natin ngayon ng tuluy-tuloy na rito n’yo lang mababasa, exclusive sa pahayagang pinakapaborito n’yong basahin – ang pahayang BULGAR.
Siyempre, kung ang Chinese Elemental Astrology ang tatanungin, sinasabing ang taong 2025 ay siya ring taon ng Animal Sign na Snake o Ahas sa elementong Wood o Kahoy.
Actually, alam naman nating lahat na hindi January 1 ang simula ng Chinese New Year kundi sa January 29. Kung saan, sa araw din ito ipinagdiriwang ang Spring Festival sa bansang China.
Kaya ang Year of the Green Wood Snake ay sakto at opisyal na magsisimula pa lamang sa January 29, 2025.
Ngunit sa ating bansa, kahit na January 29 pa ang simula ng Wood Snake, atat na atat agad tayo sa mga forecast at prediksyon ng ating mga kapalaran, kaya kahit January 1 pa lamang ay talaga namang gustung-gusto na nating malaman kung ano ang ating magiging kapalaran.
Kaya bukod sa Chinese Elemental Astrology, hahaluan na rin natin ito ng Numerology o pag-aanalisa ng mga numero ang inyong forecast ngayong taon.
Sa Numerology, walang duda at tiyak na iiral ang numerong 9, sa kapaligiran, buhay at karanasan ng isang tao. Alam kong napapaisip ka kung saan ko nakuha ang numerong 9, hindi ba? Kapag ginawang single digit ang 2025, o ‘di kaya’y i-add mo para mas lumutang ang single number, ganito ang kompyutasyon, 2025 ay 20+25=45/ at ang 45 ay 4+5=9.
Kapag nakakakita ka ng numerong 9, dalawang bagay ang pumapasok sa isip mo. Una, ang palasak, tipikal o palaging nilalaro sa playing card ng mga manunugal, walang iba kundi ang lucky 9. Kaya tiyak na maraming mga suwerte at magagandang pangyayari ang posibleng maganap sa taong ito ng 2025.
Samantala, ‘yung mga taong malas o silang minalas noong nakaraang taong 2024 dahil sa numerong 9 ay tiyak na susuwertehin na ngayong taon.
Ngunit hindi rin mapasusubalian na ang numerong 9 ay kumakatawan din sa “completeness” o “katapusan” ng bawat bilang.
Nangyaring ganu’n, dahil ang 10 na susunod sa 9 ay mapapansing pag-uulit lang ng 1.
Kaya ang 9 ang huling bilang. Kumbaga, ang totoo bilang ay 1 to 9 lamang. Muli nating isa-isahin ang bilang o numbers, 1, 2, 3, 4, 5, 6, 7, 8 at 9. Dahil ang susunod sa 9 ay 10, at tulad nang nasabi na, kapag ginawa mong single digit ang 10, 1 pa rin ang kalalabasan, 1+0=1. Gayundin ang 11, kapag ginawa mo itong single number ay 1+1=2, ulit lang ng 1 at 2.
Kaya dalawa lang ang ibig sabihin ng 9 kapag nagbibilang, ito ay katapusang bilang o last number. Ibig sabihin, kumpleto na at sa medyo malalim na paliwanag ay “kaganapan sa lahat ng bagay”, nangangahulugang titigil na ang lahat at pagkatapos ay ang muling magsisimula.
Ang 9 sa Numerology ay may kaakibat ding planeta – Planetang Mars, sa Roman-Greek mythology na siya rin “God of War” o ang “Diyos ng Digmaan”. Kaya mapapansin mo na sa taong ito, imbes na matigil ay lalo pang lalala ang mga labanan, digmaan at giyera sa iba’t ibang bahagi ng mundo.
Samantala, kung ikaw naman ay isinilang sa petsang 9, 18 at 27, tiyak na ang taong ito ang magiging significant at favorable year mo. Kung saan, maraming magagara, biglaan, malalaki at mga hindi inaasahang pangyayari ang magaganap sa iyong kapalaran.
Kaya hindi ka dapat magmadali at magpadalus-dalos sa pagdedesisyon dahil ang numerong 9 ay kaakibat ng salitang “strong number”, kaya kapag nagmadali at nagpadalus-dalos ka, dahil “strong number din ang birth date mong 9, 18 at 27”- maaaring sa kapahamakan lang mauwi ang taong 2025.
Pero kung suwabeng-suwabe mo lang gagawin ang anumang plano o pangarap mo sa buhay, tulad ng paisa-isang patak ng ulan, dahan-dahan, isa-isa, walang kahirap-hirap at suwabeng-suwabe mo ring makakamit at ipagkakaloob sa iyo ng langit ang lahat ng mga pinapangarap at inaambisyon mo sa buhay sa taong ito ng 2025.
Itutuloy….
Comments